Plan yerlərini biz müəyyənləşdirmirik. Plan yerləri Nazirlər Kabinetinin müvafiq qərarı ilə təsdiq olunur. Bu, proqnoz plan yerləridir. Əsas orada dövlət sifarişli yerlərin sayı hökumət üçün vacibdir. Çünki həmin yerlərin maliyyə vəsaiti dövlət büdcəsindən ayrılır.

AZƏRTAC xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə fevralın 25-də keçirilən mətbuat konfransında söyləyib.

M.Abbaszadə deyib ki, keçən il də, ondan əvvəlki il də III ixtisas qrupuna sənəd verənlərin sayının kəskin azaldığı müşahidə edilmişdi. Bu, reallıqdan irəli gəlir. Məsələn, bank sahəsində 10 il əvvəl olan tələbat ona gətirmişdi ki, II qrupda kifayət qədər müsabiqə vəziyyəti yaranmışdı. Lakin bir sıra banklar bağlanandan sonra mütəxəssislərdə iş problemi yarandı. Sonra II qrupa axın azaldı.