İyulun 26-da Bakıda Azərbaycan Respublikasının İnsan Hüquqları üzrə Müvəkkili (Ombudsman) Aparatının, Ədliyyə Nazirliyinin, Əmək və Əhalinin Sosial Müdafiəsi Nazirliyi, Birləşmiş Millətlər Təşkilatı, Birləşmiş Millətlər Təşkilatının İnsan Hüquqları üzrə Komissarlığı və Mediasiya Şurasının birgə təşkilatçılığı ilə “Mediasiya prosesləri zamanı əmək mübahisələrinin uğurlu həllində dövlət orqanlarının və işəgötürənlərin rolu” mövzusunda maarifləndirici ictimai müzakirə təşkil edilib.

AZƏRTAC xəbər verir ki, ictimai müzakirənin moderatoru Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin rəisi Aynur Sabitova təşkil edilən tədbirin əhəmiyyətindən danışıb. O qeyd edib ki, ictimai müzakirə, eyni zamanda, maarifləndirmə sahəsində də mühüm rol oynayır. Belə ki, mediasiya islahatlarının həyata keçirilməsində Ədliyyə Nazirliyinin də üzərinə mühüm vəzifələr qoyulub. Ədliyyə Nazirliyi hər zaman mediasiya islahatlarının uğurla davam etdirilməsi sahəsində bütün dəstəyini göstərərək, Mediasiya Şurası ilə çox sıx əməkdaşlıq edir.

Ombudsman Səbinə Əliyeva ictimai müzakirədə açılış nitqi ilə çıxış edərək, əmək hüquqlarının müdafiəsi sahəsində Ombudsman təsisatının həyata keçirdiyi fəaliyyət, bu məqsədlə dövlət qurumları, vətəndaş cəmiyyəti institutları və beynəlxalq təşkilatlarla yaradılmış əlaqələr və həyata keçirilən layihələr barədə məlumat verib. Çıxış zamanı, həmçinin ombudsmanın ünvanına daxil olan şikayətlərdə yer alan əsas problemlər və onların həlli məqsədilə görülən işlər diqqətə çatdırılıb. Ombudsman çıxışında əmək hüquqlarının təmini sahəsində təsisatın əsas fəaliyyət istiqamətlərindən biri olan “Biznes və insan hüquqları” sahəsində həyata keçirilən fəaliyyət barədə də məlumat verib. Bununla yanaşı, ombudsman əmək hüquqlarının daha səmərəli müdafiəsi məqsədilə qanunvericiliyin təkmilləşdirilməsi istiqamətində bir sıra təklif və tövsiyələrini səsləndirib.

S.Əliyeva Ombudsman təsisatı ilə Mediasiya Şurası arasında bu sahədə sıx əməkdaşlığın formalaşdığını əlavə edərək, əmək mübahisələrinin həllində işçi-işəgötürən maraqlarının balanslaşdırılması baxımından mediasiyanın rolunun əhəmiyyətinə toxunub.

İctimai müzakirədə iştirak edən əmək və əhalinin sosial müdafiəsi nazirinin müavini Anar Əliyev Mediasiya Şurası ilə nazirlik arasında çox sıx əməkdaşlığın olduğunu qeyd edib. Vurğulayıb ki, bu gün nazirlik Mediasiya Şurasında sosial işçilərlə təmin edilməsində də öz üzərinə düşən vəzifələri icra edir. Əmək mübahisələri zamanı nazirliyə aid bütün məsələlərdə nazirliyin əməkdaşları Mediasiya Şurası ilə bu məsələləri çox ciddi və çevik halda kommunikasiya edirlər. Bu isə əlbəttə ki, nəticəyönümlü olmağımıza gətirib çıxarır.

BMT-nin Qaçqınlar üzrə Ali Komissarının ölkəmizdəki nümayəndəsi Guido Ambroso bildirib ki, Azərbaycanda mediasiya sisteminin yaradılması haqqında Qanun hüquqi islahatlar sisteminin ayrılmaz tərkib hissələrindən biridir və bu, təqdirəlayiq haldır. 2019-cu ilin martında qəbul olunan bu Qanun mübahisələrin alternativ həll yolu kimi təqdim edilib. Bu, vaxta qənaət etməklə mübahisələrin ən səmərəli üsulla həll edilməsi yollarından biridir. Azərbaycanda Mediasiya Şurası yenicə yaradılmış təsisatlardan biridir.

“Artıq insanların mediator olması üçün konkret hazırlıq prosesinin keçirilməsinə başlanıb. Ümid edirik ki, mediasiya sisteminin daha da genişləndirilməsi üçün rayonlarda da müəyyən işlər aparılacaq. Mediasiya prosesində bərabərlik də çox önəmlidir. Biz bu prosesə hər bir insanın cəlb olunmasını istərdik”, - deyə Guido Ambroso qeyd edib.

Mediasiya Şurası İdarə Heyətinin sədri Nadir Adilov tədbirin təşkilinə verdiyi dəstəyə görə Azərbaycan Respublikasının insan hüquqları üzrə müvəkkili (ombudsman), Ədliyyə Nazirliyi, Əmək və Əhalinin Sosial Müdafiəsi Nazirliyi, Birləşmiş Millətlər Təşkilatı, Birləşmiş Millətlər Təşkilatının İnsan Hüquqları üzrə Komissarlığına dərin təşəkkürünü bildirib. Qeyd edib ki, Şura fəaliyyətə başladığı gündən indiyədək quruma əmək mübahisələri üzrə 1302 iş daxil olub, onlardan 205 barışıq sazişi ilə nəticələnib və bir çox hallarda bu işlər məhkəmələrə getməyib. Amma bir çox hallarda tərəflər mediasiya prosesində iştirak etmədiyindən bu işlərin bir çoxu uğursuz alınıb. Çünki işəgötürən mediasiya prosesinə gəlməkdən imtina edib, yaxud da mediasiya prosesinə gələn tərəf onun elə bir qərar qəbul etmək səlahiyyətinin olmadığını vurğulayıb. Yəni, bir çox hallarda mediasiya proseslərinin uğursuz alınmasının səbəbi təkcə mediatorlar yox, həm də tərəflər də olur.

Tərəflərdən mediasiya proseslərində iştirak etmələrini xahiş edən N.Adilov uğurlu mediasiya islahatlarının aparılmasında, mediasiya prosesində, xüsusilə əmək mübahisələrinin həllində hər iki tərəfin iştirakının zəruri olduğunu qeyd edib. Diqqətə çatdırılıb ki, əmək müqavilələrinin də yenilənməsinə ciddi ehtiyac var. Belə ki, işəgötürənlər və işçilər əmək mübahisələrinin həllində mübahisələrinə baxılacağı mediasiya təşkilatını əvvəlcədən müəyyən etməlidirlər.

Müzakirələrdə mübahisələrinin məhkəməyəqədər həlli mexanizmlərinin səmərəliliyi, bu sahədə aidiyyəti dövlət qurumlarının, mediasiya təşkilatlarının və işəgötürənlərin rolu, mediasiya prosesinin uğurla həyata keçirilməsinə maneə yaradan hallar və onların aradan qaldırılması yolları, eləcə də qeyd olunan sahədə əməkdaşlığın perspektivləri barədə müzakirələr aparılıb.