Maqsud İbrahimbəyov Yaradıcılıq Mərkəzində azərbaycanlı fantastika yazıçısı Aleksandr Hakimovun “Daşvənd otelinin qəribə müştəriləri” elmi-fantastik hekayəsi əsasında keçirilən beynəlxalq ədəbi inşa müsabiqəsinin yekunlarına həsr olunmuş görüş keçirilib.

AZƏRTAC xəbər verir ki, müsabiqə dörd ildir Bakının istedadlı gənclərini elmi fantastika janrında yazan paytaxt müəlliflərinin əsərləri ətrafında birləşdirən “Fantastik İrs” adlı böyük ədəbi layihənin tərkib hissəsidir.

Mərkəzin direktoru Anna İbrahimbəyova çıxış edərək, mədəni kimliyin mənbəyi və nəsillər arasında yaradıcı dialoq platforması kimi milli elmi fantastikaya marağın dirçəlməsinin vacibliyini vurğulayıb. O, həmçinin qeyd edib ki, görkəmli müəlliflərin irsinin yaradıcı interpretasiyası təkcə xatirə üçün deyil, həm də ədəbi inkişafın gələcəyinə atılan addımdır.

Görüş çərçivəsində iştirakçılara məşhur fantastika yazıçısı Pavel Amnuelin videomüraciəti nümayiş etdirilib.

Müsabiqənin iştirakçıları Bakı şəhərinin ümumtəhsil məktəblərinin şagirdləri olub.

Tədbir zamanı müsabiqə iştirakçıları öz əsərlərinin bədii təqdimatlarını - elmi-fantastik hekayənin əsrarəngiz qəhrəmanlarının izlərini axtardıqları İçərişəhərin tarixi guşələrinin fotoşəkillərini təqdim ediblər. Tamaşaçılara Anna İbrahimbəyova tərəfindən mövzunun orijinal şərhi də təqdim olunub.

Müsabiqənin qaliblərinə diplomlar verilib.

Yazıçının kosmik məkan haqqında informativ məlumatlardan ibarət “Marssayağı qəhvə” adlı kitabı da nəşr olunub.

Görüşün sonunda fantastika yazıçısı Emin Mahmudovun yaradıcılığına həsr olunmuş ən yaxşı esseyə - yeni ədəbi müsabiqəyə start verildiyi elan edilib.

Fantastika yazıçısı Aleksandr Hakimov AZƏRTAC -ın müxbiri ilə söhbətində təşəbbüskarı olduğu müsabiqənin artıq yaxşı ənənəyə çevrildiyini və dördüncü dəfə keçirildiyini vurğulayıb.

“Bu, həvəslə davam etdirdiyimiz və hər il həyata keçirilən layihədir. Biz hər müsabiqəni həyatı və ya yaradıcılığı Bakı ilə bağlı olan məşhur fantastika yazıçılarından birinə həsr edirik. İlk müsabiqə Maqsud İbrahimbəyova həsr olunmuşdu. Çoxları onu realist nəsr ustası kimi tanıyır, amma o, həm də fantastika janrında yazıb. Biz uşaqlara onun elmi fantastika hekayələrini oxumağı və fikirlərini bildirməyi təklif etmişik. Bu, böyük marağa səbəb oldu və o vaxtdan bəri müsabiqə hər il keçirilir”, - deyə yazıçı bildirib.

Bu il yazıçının sözlərinə görə, müsabiqə ilk dəfədir ki, onun öz əsərlərinə həsr olunub.

“Mövzularımız həmişə aktual və qeyri-adidir: Kainatın sirləri, süni intellekt, bəşəriyyətin həyatını dəyişə bilən ixtiralar - bu gün sadəcə marağa səbəb olan deyil, həm də gələcəklə bağlı suallar doğuran hər şey”, - deyə fantastika yazıçısı sözünü yekunlaşdırıb