2009-cu ildən başlayaraq ölkə ərazisində 465 modul tipli təmizləyici qurğu quraşdırılıb. Bu qurğular uzun müddətdir ki, içməli suyu Kürboyu kəndlərinin istifadəsinə verirdi. 2018-ci ilə qədər bu qurğular Ekologiya və Təbii Sərvətlər Nazirliyi tərəfindən istismar edilirdi və onlara nəzarət olunurdu. 2018-ci ildən sonra artıq “Azərsu” tərəfindən istismar olunur.

AZƏRTAC xəbər verir ki, bunu Ekologiya və Təbii Sərvətlər naziri Muxtar Babayev Azərbaycan Respublikasının Prezidenti İlham Əliyevin yanında su təsərrüfatının vəziyyətinə həsr olunmuş videoformatda keçirilən müşavirədə söyləyib.

Onun verdiyi məlumata görə, əksər modul tipli qurğular işlək vəziyyətdədir və çalışır. Lakin 2009, 2010, 2011, 2012-ci illərə qədər tikilən qurğular daha çox köhnəlib və onların ya yenisi ilə əvəzlənməsi və ya o yerlərdə su ilə mərkəzləşdirilmiş qaydada təminat daha məqsədəuyğun olar.