Avqustun 6-da Hövsan Olimpiya İdman Kompleksində kunq-fu üzrə Bakı birinciliyi və çempionatı keçirilib.

AZƏRTAC xəbər verir ki, kadet, yeniyetmə, gənc və böyüklər arasında təşkil olunan yarışda 100-dək idmançı birincilik uğrunda mübarizə aparıb.

Azərbaycan Kunq-fu Federasiyasının baş hakimi Babək Əliyev yarışın karantin qaydaları çərçivəsində keçirildiyini qeyd edərək deyib ki, yarışa 18 yaşdan yuxarı vaksinasiya olunmuş idmançılar qatılıblar. Yarışın qalibləri müxtəlif yarışlarda iştirak etmək hüququ qazanacaqlar. Çempionat milli komandanın heyətinin formalaşdırılması baxımından böyük əhəmiyyət kəsb edir.

Bakı Şəhər Gənclər və İdman Baş İdarəsinin sektor müdiri Gündüz Vəliyev yarışın əhəmiyyətini yüksək qiymətləndirib. Bildirib ki, yarışın qalibləri sentyabrın əvvəlində təşkil olunacaq Azərbaycan çempionatında iştirak hüququ qazanacaqlar.

Ölkəmizdə Vətən müharibəsi şəhidlərinin xatirəsinə müxtəlif idman növləri üzrə yarışların təşkil olunduğunu deyən G.Vəliyev yeniyemələr arasında vətənpərvərlik ruhunun formlaşdırılması və geniş yayılması istiqamətində mühüm işlərin görüldüyünü diqqətə çatdırıb.

Yarışın qaliblərinə medal və diplom təqdim edilib.