Azərbaycan Respublikası Konstitusiya Məhkəməsinin Sədri Fərhad Abdullayev avqustun 27-də Qazaxıstan Respublikasının Konstitusiya Şurasının təşkilatçılığı ilə onlayn formatda keçirilmiş “XXI əsrin Konstitusiyası – hüququn aliliyi, insan dəyəri və dövlətin səmərəliliyi” mövzusunda Asiya Konstitusiya Məhkəmələri və Ekvivalent İnstitutlar Assosiasiyasının IV Konqresində iştirak edib.

Konstitusiya Məhkəməsinin mətbuat xidmətindən AZƏRTAC-a bildiriblər ki, tədbirdə əvvəlcə Qazaxıstan Respublikasının birinci Prezidenti Nursultan Nazarbayevin Konqres iştirakçılarına ünvanladığı məktubu oxunub.

Sonra Qazaxıstan Respublikasının Prezidenti Kasım-Jomart Tokayev çıxış edərək Konqresin ölkənin Konstitusiyasının 25-ci ildönümünə təsadüf etdiyini bildirib, Əsas Qanunun respublikanın yeni hüquq sisteminin yaradılmasında və inkişafında rolunu vurğulayıb.

Tədbirdə, həmçinin Qazaxıstan Konstitusiya Şurasının sədri, hazırda adıçəkilən Assosiasiyaya sədrlik edən Kayrat Mami, Avropa Şurası Venesiya Komissiyasının sədri Canni Bukikkio, Avrasiya İqtisadi Birliyi Məhkəməsinin sədri Jolımbet Baişev, Almaniya beynəlxalq hüquqi əməkdaşlıq fondunun baş direktoru Frauke Baxler və ATƏT-in Nur-Sultandakı Proqram ofisinin rəhbəri Dyörd Sabo açılış nitqləri ilə çıxış ediblər.

Konqresin praktiki hissəsində Qazaxıstan, Türkiyə, Rusiya, Ukrayna, Latviya, Koreya, İndoneziya, Qırğızıstan, Tailand, Pakistan, Hindistan və digər ölkələrin Konstitusiya və Ali məhkəmələrinin sədrlərinin və hakimlərin qanunun aliliyinin təmin olunmasında konstitusiya nəzarəti orqanlarının rolu, COVID-19 pandemiya şəraitində insan hüquqlarının müdafiəsi, rəqəmsal transformasiya dövründə demokratik dəyərlərin və insan hüquqlarının müdafiəsi, müasir dövlətin inkişafı və digər mövzular üzrə məruzələri dinlənilib.

Tədbirin Azərbaycan Respublikası Konstitusiya Məhkəməsinin Sədri Fərhad Abdullayev “Pandemiya dövründə Azərbaycan Respublikasında konstitusiya ədalət mühakiməsinin həyata keçirilməsinin bəzi aspektləri” mövzusunda məruzə ilə çıxış edib.

Sonda Konqresin Bəyannaməsi qəbul olunub.

Bəyannamədə konstitusiya nəzarəti orqanlarının konstitusiya dəyərlərinin müdafiəsində rolu, Assosiasiyaya üzv dövlətlərin qanunvericiliyinin təkmiləşdirilməsi prosesi, pandemiya dövründə vətəndaşların hüquqlarının məhkəmə icraatları çərçivəsində təmin edilməsi və digər hüquqi məsələlər əksini tapıb.

Azərbaycan Respublikası Konstitusiya Məhkəməsinin təklifi ilə ölkələrin ərazi bütövlüyü və sərhədlərin toxunulmazlığı kimi beynəlxalq hüququn fundamental prinsipləri Assosiasiyaya üzv olan ölkələrin Konstitusiya və Ali məhkəmələri tərəfindən yekdilliklə dəstəklənərək Bəyannamənin mətninə daxil edilib.

Həmin Bəyannamə Assosiasiyaya üzv olan konstitusiya ədalət mühakiməsini həyata keçirən orqanlar tərəfindən yekdilliklə imzalanıb.