Bu gün Fövqəladə Hallar Nazirliyinin yaradılmasından 16 il ötür. Bu illər ərzində FHN ölkəmizdə uğurla fəaliyyət göstərib. Azərbaycan üçün ən xarakterik hadisə yanğınlardır. Elə ölkələr var ki, orada daha çox daşqınlar və digər təbii hadisələr baş verir. Meşə yanğınlarını yerdən söndürmək çox çətindir. Bunun üçün aviasiya dəstələrimiz, helikopterlərimiz və digər avadanlığımız var. Çalışırıq ki, peşəkarlığımızı daha da artıraq. Bu, qarşımızda duran ən mühüm məsələlərdən biridir.

AZƏRTAC xəbər verir ki, bunu fövqəladə hallar naziri Kəmaləddin Heydərov dekabrın 16-da jurnalistlərə müsahibəsində deyib.

Bu gün Azərbaycan Ordusunun dünyanın ən güclü ordularından biri olduğunu vurğulayan nazir bildirib ki, Azərbaycan işğal altındakı ərazilərini azad edən qalib dövlətdir. Azərbaycan Vətən müharibəsində tarixi Qələbə qazandı və otuz ilə yaxın davam edən işğala cəmi 44 gündə son qoydu. Ermənilərin otuz illik işğal dövründə törətdikləri vəhşiliklərin üstü indi açılır.

İşğaldan azad edilmiş ərazilərdə hazırda genişmiqyaslı quruculuq işlərinin görüldüyünü bildirən nazir bu baxımdan minatəmizləmə əməliyyatlarının sürətlə həyata keçirilməsinin vacibliyini qeyd edərək deyib: “Ermənistanın ölkəmizə verdiyi mina xəritələri tam dəqiq deyil. Minatəmizləmə əməliyyatlarının daha sürətlə aparılması üçün Prezident İlham Əliyevin tapşırığına əsasən, Fövqəladə Hallar Nazirliyində minatəmizləmə alayı yaradılıb. Bundan başqa, ən müasir avadanlıq alınıb, xüsusi itlər hazırlanır”.

Fövqəladə hallar naziri müsahibəsində sahibkarlara və mülk sahiblərinə müraciət edərək deyib: “Mülk sahibləri, sahibkarlar mülkiyyətlərində olan əmlakları sığortalamalıdırlar. Ölkəmizdə bir neçə sığorta şirkəti var. Onların sığorta ilə bağlı məbləği o qədər də yüksək deyil. Hər bir vətəndaş buna əməl etsə, heç bir problemimiz olmayacaq”.