O da hamı kimi doğulub, hamı kimi yaşayıb. Çantasını götürüb yaşıdlarına qoşularaq məktəbə gedib, "qaçdı-tutdu" oynayıb, futbol topu qovub, kəndin yal-yamaclarında qoyun-quzu otarıb. Çox vaxt tay-tuşları onun qaçış sürətindən geri qalıb, yerişi ilə ayaqlaşa bilməyiblər.

AZƏRTAC xəbər verir ki, Söhbət Şirinov Ağdam rayonunun Şotlanlı kəndində oxuyarkən gündüz məktəbə gedər, dərsdən qayıdandan sonra doğma kəndin ətrafında qazılan səngərlərdə hərbçilər, könüllülər və kənd sakinləri ilə birlikdə erməni quldur birləşmələrinin təcavüzkar əməllərinə cavab verərdi. Silahla davranmağı, səngərdə düşmən atəşinə cavab verməyi də elə o vaxtdan öyrənmişdi.

Orta məktəbi qurtarandan bir il sonra -1992-ci ilin yayında hərbi xidmətə çağırılan gündən sonra da bu fəaliyyətini davam etdirib. Necə deyərlər, döyüşə-döyüşə müharibəyə gedib.

1992-ci il iyulun 4-də isə yerişi, duruşu ilə hamını heyran qoyan bu boy-buxunlu, yaraşıqlı oğlan ayaqsız qalıb. O, həmin hadisəni belə xatırlayır: “Ağdamda Milli Qəhrəman Şirin Mirzəyevin rəhbərlik etdiyi batalyonda minaaxtaran bölüyün əsgəri idim. Növbəti döyüş tapşırığını yerinə yetirməyə gedərkən yüngül zirehli döyüş maşınında rayonun Yeni Qaralar kəndi yaxınlığında ermənilərin torpağa basdırdığı minaya düşdük. Yeddi döyüşçüdən ikisi yaralandı. Mən sağ ayağımı itirdim, döyüş yoldaşım isə alnından və qolundan xəsarət aldı”.

Bundan sonra Söhbət Elmi-Tədqiqat Travmatologiya və Ortopediya İnstitutunda müalicə olunub, ikinci qrup Qarabağ müharibəsi əlili dərəcəsi alıb. Aradan keçən 29 il ərzində təxminən hər iki ildən bir protezlə təmin olunub. Doğrudur, həmin protezlər onun hərəkətinə xeyli dərəcədə kömək edib. Lakin son günlər veteran döyüşçü “Genium” tipli yüksək texnologiyalı protezlə təmin olunub və 4-cü nəsil protezi aktivlik və funksionallığı ilə əvvəlkilərdən seçilir.

Quş tək qanadı ilə uça bilmədiyi kimi, insan da tək ayaqla yarımcan olur. Lakin Söhbət Vətən yolunda ayağını itirdiyinə görə qətiyyən təəssüflənmir: “Məni ayağını itirməyimi yox, torpağımızı, yurdumuzu itirməyimiz daha çox göynədib. Lakin 2020-ci ilin payızında Prezident, Ali Baş Komandan İlham Əliyevin rəhbərliyi ilə Milli Ordunun Qarabağı düşmən tapdağından azad etməsi keçmiş döyüşçü, Vətənin sadiq əsgəri kimi məni hədsiz sevindirdi. İndi ailəmizdə çağırış yaşını haqlayan iki övladım –Aqil və Adil vətənə məhəbbət ruhunda böyüyür. Ən çox ona sevinirəm ki, onlar azad və abad bir yurdun vətəndaşlarıdır”.