5 avqust saat 06:00-dan etibarən Ekologiya və Təbii Sərvətlər Nazirliyi, Fövqəladə Hallar Nazirliyi və Bakı Şəhər İcra Hakimiyyəti tərəfindən karantin rejiminin tələblərinə uyğun müəyyən edilən qaydalar çərçivəsində ölkə üzrə çimərliklərin istifadəsinə icazə verilib.

AZƏRTAC xəbər verir ki, pandemiya dövründə çimərliklərdən istifadəni tənzimləmək üçün cimerlik.az saytı fəaliyyətə başlayıb.

cimerlik.az saytında Bakı və Sumqayıt şəhərləri ərazisindəki ümumilikdə 100-dən çox çimərlik barədə məlumat əksini tapıb. Vətəndaşlar sayt vasitəsilə çimərliklərin siyahısı, doluluq səviyyəsi, infrastruktur və şərait, ünvan və yerləşmə yeri və s. məlumatları əldə edə bilərlər. Çimərliklərə getməmişdən əvvəl cimerlik.az saytına daxil olmaq, çimərliklərdəki sıxlıq səviyyəsini yoxlayaraq daha az insanın olduğu əraziyə üz tutmaq tövsiyə olunur. cimerlik.az saytında adı qeyd olunmayan çimərliklərə üz tutduqda pandemiya ilə bağlı monitorinq aparılmadığından ehtiyatlı olmaq məsləhət görülür.

Qeyd edək ki, çimərliklər səhər saat 8:00-dan axşam saat 21:00-a kimi fəaliyyət göstərəcək.