Yerli jurnalistlərin Azərbaycanın nəzarətinə keçən Laçın şəhərinə səfəri başlayıb.

AZƏRTAC-ın Laçına ezam olunmuş əməkdaşı xəbər verir ki, səfərdə jurnalistlərlə yanaşı, hərbi ekspertlər, laçınlı hərbi qulluqçular da iştirak edirlər.

Səfər çərçivəsində jurnalistlər ermənilər tərəfindən yandırılaraq dağıdılan evlərə, inzibati ərazilərə baş çəkəcəklər.

Media nümayəndələri şəhər ərazisində Azərbaycan Ordusunun yeni dislokasiya məntəqələri, yeni xidməti fəaliyyətə başlayan hərbi polis bölmələri və mühəndis işləri ilə yaxından tanış olacaqlar.

Jurnalistlərin, həmçinin Laçının Zabux və Sus kəndlərinə də səfəri planlaşdırılır.

Xatırladaq ki, avqustun 26-da Prezident İlham Əliyev tviter səhifəsində Azərbaycan Ordusunun Laçın şəhərində yerləşməsi ilə bağlı paylaşım edib. Ali Baş Komandan həmin gün azərbaycanlıların Laçın şəhərinə qayıtdığının, Laçın şəhərinin, Zabux və Sus kəndlərinin nəzarətə götürüldüyünün müjdəsini verib. Bununla bağlı bütün laçınlıları və Azərbaycan xalqını təbrik edib