Noyabrın 6-da Gənclər Fondunun sosial müdafiəyə ehtiyacı olan istedadlı gənclərin təhsil xərclərinin maliyyələşdirilməsi üzrə müsabiqə elan etməsi ilə bağlı brifinq keçirilib.
×
Noyabrın 6-da Gənclər Fondunun sosial müdafiəyə ehtiyacı olan istedadlı gənclərin təhsil xərclərinin maliyyələşdirilməsi üzrə müsabiqə elan etməsi ilə bağlı brifinq keçirilib.
AZƏRTAC xəbər verir ki, brifinqdə çıxış edən Gənclər Fondunun icraçı direktoru Fərid Cəfərov işğal altında olan torpaqlarımızın azad edilməsi uğrunda Vətən müharibəsinin və COVID-19 pandemiyası ilə gərgin mübarizənin davam etdiyi günlərdə bu addımın vətəndaşlarımızın, o cümlədən gənclərin təhsil, inkişaf, sosial rifah məsələlərini diqqət mərkəzində saxlayan Azərbaycan Prezidenti İlham Əliyevin müvafiq göstərişi ilə atıldığını bildirib. O qeyd edib ki, indiyədək Azərbaycan Prezidentinin təşəbbüsü ilə bir sıra sosial həssas kateqoriyadan olan tələbələr təhsil haqqından azad edilib, eyni zamanda, yeni növ koronavirus pandemiyası ilə əlaqədar minlərlə tələbənin təhsil xərcləri dövlət tərəfindən ödənilib: “Ali və orta ixtisas təhsili müəssisələrində təhsil alan və yüksək təhsil göstəriciləri ilə fərqlənən gənclərin təhsil xərclərinin Gənclər Fondu tərəfindən qarşılanması üzrə müsabiqə də bu istiqamətdə həyata keçirilən tədbirlərin tərkib hissəsidir. Dövlət ali və orta ixtisas təhsili müəssisələrində təhsil alan gənclərə şamil ediləcək müsabiqədə 29 yaşadək gənclər iştirak edə bilər”.
F.Cəfərov diqqətə çatdırıb ki, müsabiqə artıq üçüncü dəfədir keçirilir. Gənclər Fondu tərəfindən 2018 və 2019-cu illərdə 664 tələbənin təhsil haqqı borcları dövlət hesabına qarşılanıb. Müsabiqə zamanı tələbənin təhsil göstəriciləri, həmçinin ictimai fəallığı əsas götürülərək bir sıra kateqoriyaya aid edilən şəxslərə üstünlük veriləcək. Bu kateqoriyaya Milli qəhrəmanların övladları, fiziki məhdudiyyətli, eləcə də valideynlərini itirmiş, valideyn himayəsindən məhrum olmuş, valideynlərindən biri əlil olan və aztəminatlı ailədən olan gənclər daxildir. Ötən il Gənclər Fondu tərəfindən 47 tələbənin xaricdə təhsili maliyyələşdirilib və növbəti ildən proqramın coğrafiyasının daha da genişləndirilməsi nəzərdə tutulur.
İcraçı direktor əlavə edib ki, maliyyələşmə 2019-2020 və ya 2020-2021-ci tədris ili üçün təhsil haqqı xərclərinin qarşılanmasını nəzərdə tutur.
Müsabiqənin qaydaları ilə tanış olmaq və qeydiyyatdan keçmək üçün Gənclər Fondunun rəsmi saytı (www.youthfoundation.az) və GəncAPP mobil tətbiqinə müraciət etmək lazımdır.
Müraciətlər noyabrın 30-u saat 18:00-dək qəbul ediləcək. Nəticələr barədə məlumat Fondun rəsmi internet səhifəsində paylaşılacaq.