Azərbaycan regional və beynəlxalq enerji təhlükəsizliyinin qorunmasında vacib rol oynayan ölkələrdən biridir. Yaponiya şirkətləri uzun müddətdir Azərbaycan iqtisadiyyatının aparıcı sahəsi olan enerji sektoruna töhfə verir. Hazırda digər sektorlarda fəaliyyət üçün böyük imkanlar yaranıb. Həmin məqsədlə Azərbaycan Respublikası ilə Yaponiya arasında İqtisadi Əməkdaşlıq üzrə Dövlət Komissiyasının və Azərbaycan-Yaponiya İqtisadi Komitəsinin 11-ci birgə iclası zamanı biz keçən müddət ərzində görülmüş işlər, həlli tələb olunan məsələlər, eləcə də qarşıdakı dövr üçün əməkdaşlığın genişləndirilməsi barədə müzakirələr aparacağıq. Həmçinin iki gün ərzində paralel görüşlər və ərazi səfərləri də baş tutacaq.

AZƏRTAC xəbər verir ki, bunu iclasda çıxış edən ekologiya və təbii sərvətlər naziri Muxtar Babayev deyib.

Nazir bildirib ki, komissiyanın sonuncu iclasından keçən dövr ərzində Azərbaycan bir çox uğura imza atıb: "Onlardan ən vacibi 2020-ci ildə Müzəffər Ali Baş Komandan, Prezident İlham Əliyevin rəhbərliyi altında torpaqlarımızın işğaldan azad edilməsidir. Bununla da regionda yeni geosiyasi vəziyyət yaranıb. İşğaldan azad edilən ərazilərdə aparılan bərpa və yenidənqurma fəaliyyəti bölgənin sülh, sabitlik və əməkdaşlıq zonası kimi xidmət etməsinə zəmin yaradıb.

Komissiyanın iclası çərçivəsində işğaldan azad edilmiş ərazilərdə aparılan işlərlə tanışlıq, eləcə də qarşılıqlı əməkdaşlıq imkanlarının araşdırılması məqsədilə tərəfimizdən Yaponiya nümayəndə heyətinə həmin ərazilərə səfər təklif edilib".

M.Babayev bugünkü iclasda Yaponiya tərəfdən 15 şirkət və iki dövlət qurumunun - Yaponiya İqtisadiyyat, Ticarət və Sənaye Nazirliyi və Yaponiyanın Rusiya və MDB ölkələri ilə Ticarət Assosiasiyası da daxil olmaqla ümumilikdə 50-yə yaxın əsasən iş adamından ibarət nümayəndənin iştirak etdiyini diqqətə çatdırıb: "Şirkətlərdən bəziləri ilk dəfə olaraq Azərbaycana səfər edir. Qarşılıqlı olaraq Azərbaycan tərəfindən də Komissiyaya üzv olan qurumlarla yanaşı, bir sıra özəl sektorun nümayəndələri iştirak edirlər. Məlum olduğu kimi, komissiyanın 10-cu iclası 2019-cu ildə Tokioda keçirilib. 11-ci iclasın ötən il Bakıda keçirilməsi planlaşdırılsa da, koronavirus pandemiyası səbəbindən təxirə salındı. Lakin 2022-ci ildə keçirilməsi bir tərəfdən də xoş təsadüfə səbəb oldu. Çünki biz bu il ölkələrimiz arasında diplomatik münasibətlərin qurulmasının 30 illiyini qeyd edirik. Otuz illik yubileyin səmərəli şəkildə qeyd olunması üçün hər iki tərəfdən dövlət qurumları, təşkilatlar və ölkələrimizin səfirləri böyük səy göstərir"