Bu gün hakimliyə namizədlərin seçilməsi üzrə müsabiqənin növbəti mərhələsi keçirildi. Bu proses dövlətimizin başçısı İlham Əliyevin “Məhkəmə-hüquq sistemində islahatların dərinləşdirilməsi haqqında” 2019-cu il 3 aprel tarixli Fərmanın icrasına xidmət edir. Həmin Fərmanda mövcud hakim ştatlarına əlavə olaraq, 200 yeni hakim ştatı yaradılıb. Bu 200 vakant ştatın, eyni zamanda, yaş həddi, qiymətləndirilmənin nəticəsi ilə bağlı yaranan digər vakant yerlərin doldurulması ilə əlaqədar hakimliyə namizədlərin seçim prosesi həyata keçirilir.

AZƏRTAC xəbər verir ki, bunu Hakimlərin Seçki Komitəsinin sədri İman Nağıyev iyunun 8-də hakimliyə namizədlər üçün Dövlət İmtahan Mərkəzində keçirilən test imtahanı ilə bağlı jurnalistlərə müsahibəsində deyib.

İman Nağıyev bildirib ki, bu proses mərhələli şəkildə aparılır. Birinci seçim turu üzrə artıq 44 nəfər hakim vəzifəsinə təyinat alıb və onlar hazırda fəaliyyət göstərirlər. İkinci seçim turu üzrə artıq imtahan prosesi başa çatıb və 39 nəfər təyinat gözləyir. Növbəti - üçüncü seçim turu üzrə 47 nəfər tədris mərhələsindədir. Onlar tədrisədək olan imtahan proseslərini başa vurublar. Yəni, onlar tədrisdən sonrakı mərhələyə artıq keçiblər. Dördüncü seçim turu üzrə iki imtahanın nəticəsinə görə 54 nəfər şifahi imtahan mərhələsinə buraxılıb. Bu gün keçirilən imtahan beşinci seçim turudur. Bugünkü imtahanda hakimliyə namizəd olmaq üçün ərizə verənlərdən 200-dək şəxs iştirak edib. Bu test imtahanın nəticəsinə görə 60 və daha yüksək bal toplayan namizədlər növbəti yazılı imtahan mərhələsində iştirak edəcəklər. Vakant hakim vəzifəsinə namizədlərin seçilməsi prosesi mərhələli qaydada başa çatdırılacaq.