Sentyabrın 19-da “İçərişəhər” Dövlət Tarix-Memarlıq Qoruğu İdarəsi və Azərbaycan Respublikasının Gənclər Fondunun təşkilatçılığı ilə Qoşa Qala meydanında Cənubi Qafqazın ən böyük kvest çempionatının açılış mərasimi keçirilib.

AZƏRTAC xəbər verir ki, təşkil olunan çempionatda 35 komanda və 525 gənc iştirak edir.

Kvest marşrutu gənclərə İçərişəhərin dar küçələrini, memarlıq incilərini və tarixi abidələrini fərqli prizmadan kəşf etmək imkanı yaradacaq. Tapşırıqlar İçərişəhərin məşhur və çox az tanınan, lakin tarixi baxımdan mühüm obyektlərinə dair verilib.

Layihə gənclərdə komanda ruhunu, strateji düşüncəni və tarixə marağı gücləndirmək, həm də könüllülük və vətəndaş fəallığını təşviq etmək məqsədini daşıyır.

Sonda çempionat qalibləri kubok, medal və xüsusi mükafatlarla təltif olunacaqlar.