Martın 26-da Bakıda Hindistan məhsullarının ən böyük eksklüziv “Best of India” Ticarət sərgisinin açılış mərasimi keçirilib.

AZƏRTAC xəbər verir ki, “Best of lndia”- Hindistan məhsullarının ən böyük eksklüziv ticarət sərgisinin 8-ci buraxılışının açılışında ekologiya və təbii sərvətlər nazirinin müavini Firdovsi Əliyev, Hindistanın ölkəmizdəki səfiri Bavitlunq Vanlalvavna, Yun və Yun Məhsullarının İxracının Təşviqi Şurasının sədri Sanjeev Dhir iştirak ediblər.

Tədbiri giriş sözü ilə açan B.Vanlalvavna tədbirin Hindistanın müstəqilliyinin 75-ci ildönümünü münasibətilə Azadi Ka Amrit Mahotsav təşəbbüsü çərçivəsində keçirilən geniş tədbirlər silsiləsinin bir hissəsi olduğunu qeyd edib. Ölkələrimiz arasında iqtisadi əlaqələrin şaxələndirilməsi üçün böyük potensial olduğunu vurğulayan səfir Azərbaycanda Hindistan məhsulları və xidmətləri üçün yaxşı imkanlar olduğunu qeyd edib: "Pandemiyaya baxmayaraq, iki ölkə arasında iqtisadi əlaqələr genişlənməkdə davam edir. Ötən il Hindistan və Azərbaycan arasında ümumi ticarət dövriyyəsinin həcmi 2020-ci illə müqayisədə 27 faiz artıb. Bu sərginin iki ölkə arasında iqtisadi əlaqələrin genişləndirilməsinə töhfə verəcəyinə inanıram”.

Ekologiya və təbii sərvətlər nazirinin müavini Firdovsi Əliyev ölkələrimiz arasında yüksək səviyyəli qarşılıqlı etimadın mövcud olduğunu diqqətə çatdırıb. Nazir müavini həyatın bütün sahələrində Azərbaycan ilə Hindistan arasında əməkdaşlığın inkişafı və dərinləşməsi üçün yaranan yeni imkanlardan danışıb. Ölkələrimiz arasında böyük iqtisadi potensial, hüquqi baza, əlverişli investisiya mühiti olduğunu diqqətə çatdıran F.Əliyev sərginin əhəmiyyətini qeyd edib. Nazir müavini bu qəbildən olan tədbirlərin davamlı olaraq təşkil olunacağına ümid etdiyini bildirib.

Yun və Yun Məhsullarının İxracının Təşviqi Şurasının sədri Sanjeev Dhir Hindistanın yun məhsulları üçün Azərbaycanda böyük potensialın olduğunu bildirib. O vurğulayıb ki, Hindistan məhsulları həm keyfiyyət, həm də kəmiyyət baxımından qlobal miqyasda rəqabətədavamlı olduğundan bu bazarda Hindistanın yun və digər tekstil məhsullarının, eləcə də əl işləri məmulatlarının payını artırmaq olar.

Qeyd edək ki, Bakı İdman Sarayında keçirilən “Best of India” sərgisi “ANM Exhibitions” şirkəti, Yun və Yun məhsullarının İxracının Təşviqi Şurası və Hindistanın Bakıdakı səfirliyinin təşkilatçılığı ilə keçirilir. Xarici ölkələrdə ardıcıl olaraq təşkil olunan bu sərgi, Hindistan sənayesinin yüksəkkeyfiyyətli moda, tekstil və həyat tərzi məhsullarını dünyaya tanıdır.

Sərginin 9 günü ərzində Hindistanın 60-a yaxın şirkəti düyü, çay, ədviyyatlar, hədiyyələr, əl işləri, ev mebeli kimi yüksəkkeyfiyyətli məhsul və xidmətlərini nümayiş etdirəcək.

Sərgidə həm də Hindistanın mədəniyyəti, adət-ənənələrini, turizmi əks etdirən təqdimat videoları da nümayiş etdirilir.

Sərgi salonunda əsl Hindistan çayının dadına baxılması və xına (Mehndi) mərasimi üçün qoyulan stendlər, ifa olunan ənənəvi hind rəqsləri və mahnıları ziyarətçilərin diqqətini cəlb edir.

Sərgi martın 26-dan aprelin 3-dək saat 11:00-dan 19:00-dək davam edəcək. Sərgiyə giriş ödənişsizdir.