Son 4 ildə minimum pensiya 82 faiz artaraq 200 manat olub. Həmin dövrdə orta aylıq pensiya 60 faiz artaraq 331 manat təşkil edib. Son 4 ildə yaşa görə orta aylıq pensiya 53 faiz artaraq 358 manata, əlilliyə görə orta aylıq pensiya 67 faiz artaraq 293 manata, ailə başçısını itirməyə görə orta aylıq pensiya 75 faiz artaraq 287 manata çatdırılıb.

AZƏRTAC xəbər verir ki, bu statistika Dövlət Sosial Müdafiə Fondunun sədri Himalay Məmişov ilin yekunlarına dair keçirdiyi mətbuat konfransında səslənib.

O, pensiya, təqaüd və müavinətlərin artımı barədə məlumat verərkən deyib: “Həmin dövrdə müavinətlərin orta məbləği 95 faiz, maksimum məbləği isə 65 faiz artıb. Son 4 ildə təqaüdün maksimum məbləği 54 faiz artaraq 2000 manata çatdırılıb. Yaşayış minimumu isə 26 faiz artaraq 196 manat olub".