Mayın 9-da Heydər Əliyev Mərkəzində müasir müstəqil Azərbaycanın qurucusu, xalqımızın ümummilli lideri Heydər Əliyevin anadan olmasının 99-cu ildönümünə həsr edilmiş konfrans keçirilib.

AZƏRTAC xəbər verir ki, Heydər Əliyev Mərkəzi, Azərbaycan Gənclər Fondu və “Regional İnkişaf” İctimai Birliyinin birgə təşkilatçılığı ilə keçirilən “Heydər Əliyev və gənclər siyasəti” mövzusunda konfransda əvvəlcə Ulu Öndərin həyat və fəaliyyətindən bəhs edən “Böyük ömrün anları” filmi nümayiş olunub.

Ölkəmizdə fəaliyyət göstərən gənclər və könüllü təşkilatlarının nümayəndələrinin iştirak etdikləri konfransda çıxış edən Azərbaycan Gənclər Fondunun İcraçı direktoru Fərid Cəfərov belə anım tədbirlərinin Azərbaycanın bütün regionlarında, eləcə də bir çox xarici ölkələrdə təşkil olunduğunu bildirib. O, Ulu Öndərin gənclər siyasətinin formalaşdırılmasında misilsiz rolundan danışıb.

AMEA-nın Fəlsəfə və Sosiologiya İnstitutunun direktoru İlham Məmmədzadə çıxışında bildirib ki, ulu öndər Heydər Əliyev Azərbaycan gənclərinin keyfiyyətli təhsil almasını çox istəyirdi. Vurğulanıb ki, Ümummilli Lider Azərbaycan gənclərini təhsil almaq üçün o zamanın ən müasir və qabaqcıl universitetlərinə göndərirdi.

Sonra çıxış edən Azərbaycan Respublikası Prezidenti yanında Dövlət İdarəçilik Akademiyasının professoru Fuad Məmmədov ulu öndər Heydər Əliyevin çox vətənpərvər, uzaqgörən və müdrik şəxsiyyət olduğunu qeyd edib. O, Ümummilli Liderin hər zaman çıxışlarında Azərbaycanın ədalətli mövqeyini dünyaya çatdırıdığını vurğulayıb.

Heydər Əliyev Mərkəzinin şöbə müdiri Rəna Məmmədova isə Mərkəzin Heydər Əliyev irsinin tədqiqi istiqamətində gördüyü işlər haqqında məlumat verib. Bildirib ki, böyük bir ömrü və tarixi dövrü əhatə edən Heydər Əliyev irsi, onun dövlətçilik ənənələri geniş elmi məqalələrinin əsaslarını təşkil edir.

“Regional İnkişaf” İctimai Birliyinin şöbə müdiri Hüseyn Abdullayev çıxışında ümummilli lider Heydər Əliyevin anaadan olmasının 99-cu ildönümünün hər bir azərbaycanlı tərəfindən dərin ehtiramla qeyd edildiyini bildirib. Diqqətə çatdırılıb ki, Ulu Öndər öz fəaliyyətində hər zaman gənclərin hərtərəfli inkişafına önəm verib.

Konfransda, həmçinin bildirilib ki, Ümummilli Liderin bilavasitə rəhbərliyi ilə müstəqil Azərbaycanda aparılan gənclər siyasəti hər bir gəncin vətənpərvərlik, dövlətçilik prinsipləri əsasında, xalqımızın tarixinə, mədəni irsinə hörmət ruhunda yetişməsi, cəmiyyətin ictimai-siyasi və sosial-iqtisadi həyatında fəal iştirakının təmin edilməsi kimi vacib məsələləri özündə ehtiva edir.

Diqqətə çatdırılıb ki, hazırda Ümummilli Liderin siyasi kursu müasir dövrün tələblərinə uyğun olaraq Prezident İlham Əliyev və Birinci vitse-prezident Mehriban Əliyeva tərəfindən uğurla davam və inkişaf etdirilir. Gənclərə göstərilən diqqət və qayğı nəticəsində bu gün ölkəmizdə bilikli, bacarıqlı, geniş dünyagörüşlü, vətənpərvər, xalqına, dövlətinə bağlı gənclər yetişib. Azərbaycan Prezidenti İlham Əliyevin qeyd etdiyi kimi, məhz həmin gənclər 44 günlük Vətən müharibəsində böyük Zəfər qazanaraq, torpaqlarımızı düşmən işğalından azad ediblər.

Çıxışlarda, eyni zamanda, ümummilli lider Heydər Əliyevin zəngin irsinin, dövlətçilik fəlsəfəsinin öyrənilməsi, tədqiqi və geniş təbliği və digər sahələrdə layihələrin həyata keçirilməsində təşəbbüskarlığın, bu istiqamətdə ölkəmizdə fəaliyyət göstərən gənclər və könüllü təşkilatlarının birgə səylərinin artırılmasının vacibliyi diqqətə çatdırılıb.