Azərbaycan əsgəri 30 illik işğal dövründən sonra Laçın rayonuna, Laçın yoluna, Sus və Zabux kəndlərinə nəzarəti tamamilə bərpa edib.
×
Azərbaycan əsgəri 30 illik işğal dövründən sonra Laçın rayonuna, Laçın yoluna, Sus və Zabux kəndlərinə nəzarəti tamamilə bərpa edib. İşğal dövründə Ermənistanın Qarabağla birbaşa əlaqəsini təmin edən Laçın dəhlizi kifayət qədər ciddi bir infrastruktur olaraq ermənilərin qaz, su, elektrik xətlərinin, həmçinin internet, telefon rabitəsinin və digər zəruri ehtiyaclarının təminatında mühüm rol oynayırdı. Bu səbəbdən biz onu Laçın dəhlizi adlandırırdıq. Ancaq indi bura dəhliz deyil, sadəcə Laçın yoludur. Çünki adı çəkilən obyektlər, infrastrukturlar artıq Azərbaycan əsgərinin nəzarətindədir. Biz bu gün Laçında olmaqdan qürur duyuruq.
AZƏRTAC xəbər verir ki, bu sözləri hərbi ekspert Ədalət Verdiyev Laçına səfəri zamanı deyib.
“Zamanında qoruya bilmədiyimiz Laçını heç vaxt görməyən, ancaq televiziyalardan və verilişlərdən izləyən övladlarımız azad etdilər. Bu ərazilərin nə qədər strateji əhəmiyyətə malik olduğu göz önündədir. Bu əraziləri zamanında müxtəlif səbəblərdən - vahid komandanlığın olmaması, müxtəlif siyasi qüvvələrin silahlı bölmələrə malik olub hər birinin fərqli istiqamətlərdə fəaliyyət göstərməsi sonda Laçın rayonunun ermənilərin nəzarətinə keçməsi ilə nəticələndi. Nəhayət bütün bunlara son qoyuldu və biz Laçına əbədi qayıtdıq. Bu qüruru, sevinci bizə yaşadan şəhidlərimizə Allahdan rəhmət diləyirəm, qazilərimizə isə can sağlığı arzulayıram. Bu gün ən xoşbəxt günlərimdən biridir”, - deyə Ədalət Verdiyev bildirib