Xaricdə olan Azərbaycan vətəndaşlarının ölkəyə yola salınması istiqamətində tədbirlər davam etdirilir. Koronavirus (COVID-19) pandemiyasının yayılma təhlükəsi səbəbindən sərhədlərin bağlanmasına görə müvəqqəti olaraq (xidməti və şəxsi səfərlər ilə əlaqədar) Qazaxıstanda qalan daha 33 vətəndaş Azərbaycana yola salınıb.

Azərbaycanın Aktaudakı Baş Konsuluğundan AZƏRTAC-a bildiriblər ki, “Azərbaycan Xəzər Dəniz Gəmiçiliyi” QSC-nin “Bərdə” (5 nəfər) və “Merkuri” (28 nəfər) bərə-gəmiləri ilə yola salınan vətəndaşların hamısı COVID-19 pandemiyası ilə əlaqədar testdən keçiriliblər.

Qeyd edək ki, cari il iyulun 23-dən etibarən Baş Konsulluğun “qaynar xətt”i vasitəsilə qeydiyyatdan keçən vətəndaşlar Aktau limanından Vətənə yola salınır. Bu günədək Aktaudan gəmi ilə ümumilikdə 213, Almatıdan “Azərbaycan Hava Yolları” QSC-nin xüsusi çarter reysi ilə 117 Azərbaycan vətəndaşı ölkəmizə təxliyə edilib.

Xatırladaq ki, Baş Konsulluqda Azərbaycana gedəcəyini gözləyən vətəndaşların qeydiyyat prosesi davam etdirilir.

İlahə Əhmədova

AZƏRTAC-ın xüsusi müxbiri

Nur-Sultan