Bu gün Azərbaycan Tibb Universitetində (ATU) şəhid məzunların xatirəsinə ucaldılmış abidə kompleksinin açılışı olub. Açılışda şəhid ailələri də iştirak edib.

“Bu gün Tibb Universitetində həkim şəhidlərin xatirə abidəsinin önündə dayanmaq mənim üçün nə qədər çətindirsə, bir o qədər qürurvericidir. Çünki Azərbaycanın ərazi bütövlüyü uğrunda tökülən qanlarda, verilən canlarda bizimdə payımız var. Bu gün Şöhrətin oxuduğu universitetdə, onun adının həkk olunduğu abidənin önündə olmaq çox çətindir. Torpaqlarımızın işğaldan azad olunması bizim tək təsəllimizdir. Şöhrətin arzusu şəhidlik zirvəsinə ucalmaq idi. O, öz arzusuna çatıb”.

Bunu AZƏRTAC-a müsahibəsində şəhid həkim Şöhrət Qasımovun həyat yoldaşı deyib.

O, həmçinin deyib: “Allah bir daha xalqımıza belə acı günlər yaşatmasın. Ərazi bütövlüyümüz əbədi olsun. Mən əminəm ki, onun övladları Şöhrətin yolunu davam edəcək. Bu abidənin quraşdırılmasına görə universitetin rektoruna və əməyi keçən hər kəsə öz təşəkkürümü bildirirəm”.