Koronavirus pandemiyası dövründə vərəmlə yoluxma sayında nəzərəçarpacaq dərəcədə azalma qeydə alınıb. Vərəm artıq texniki problem deyil, onun müalicə edilməsi üçün müayinə imkanları var.

AZƏRTAC xəbər verir ki, bunu Ümumdünya Səhiyyə Təşkilatının Azərbaycandakı nümayəndəsi Hande Harmancı Ümumdünya Vərəmlə Mübarizə Gününə həsr olunan konfransda deyib.

“COVID-lə mübarizədə biz peyvəndlər və dərmanlar hazırlamalıydıqsa, vərəmin müalicəsi üçün artıq bizim bütün imkanlarımız var. Yalnız əməkdaşlıq etməliyik və diqqət artırmalıyıq. İnnovasiya gələcəyin inkişaf açarıdır və ancaq bu şəkildə irəliləyə bilərik. Azərbaycanda bu sahədə mövcud qanunvericiliyin mütəmadi şəkildə nəzərdən keçirilməsi yaxşı haldır. Bizim dəstəyimizə ehtiyac varsa, kömək etməyə hazırıq”, - deyə ÜST rəsmisi bildirib.