"Azərişıq" ASC-nin Hadrutda təşkil etdiyi Ümummilli Lider Heydər Əliyevin 100 illik yubileyinə həsr olunmuş Türkdilli dövlətlərin gənc energetikləri arasında "Paylayıcı Şəbəkələrin Rəqəmsal Transformasiyası" I Beynəlxalq Peşə Ustalığı Yarışması keçirilir.

AZƏRTAC-ın Hadruta ezam olunmuş müxbiri xəbər verir ki, oktyabrın 17-dən 20-dək davam edəcək yarışa Azərbaycanla yanaşı Qazaxıstan, Qırğızıstan, Tatarıstan, Türkiyə və Özbəkistandan energetiklərdən ibarət komandalar qatılıb.

Yarış iştirakçıları əvvəlcə Bakıda Fəxri xiyabanda Ümummilli Lider Heydər Əliyevin məzarını ziyarət edib, önünə gül dəstələri düzüblər. Sonra açılış mərasimində iştirak etmək üçün Hadruta yola düşüblər.

Hadrutda keçirilən açılış mərasimində ölkələrin təqdim edilməsindən sonra Azərbaycan Respublikasının Dövlət Himni səsləndirilib. Daha sonra işğaldan azad olunmuş ərazilərimizdə dövlət başçısı İlham Əliyevin tapşırıqları əsasında "Azərişıq" ASC tərəfindən görülən yenidənqurma işləri haqda məlumat verilib. Həmçinin Ümummilli Lider Heydər Əliyevin Azərbaycanın elektroenergetikasının inkişafındakı müstəsna rolundan bəhs edən film nümayiş olunub.

Rəsmi hissə başa çatdıqdan sonra gənc energetiklər arasında I Beynəlxalq Peşə Ustalığı Yarışmasına start verilib.

Hər ölkədən 1 komanda, Türkiyədən isə 2 komanda mübarizə aparıb.

Elektroenergetikanın tarixi, inkişafı və müasir vəziyyəti mövzusunda tərtib olunan intellektual suallar cavablandırılıb. İntellektual yarışma başa çatdıqdan sonra xarici qonaqlar istifadəyə verilən Hadrut Qovşaq Yarımstansiyası və Rəqəmsal İdarəetmə Mərkəzi ilə tanış olublar. Tədbir iştirakçılarına ən müasir avadanlıqlarla təchiz edilən mərkəz haqda ətraflı məlumat verilib.

Qeyd edək ki, "Paylayıcı Şəbəkələrin Rəqəmsal Transformasiyası" I Beynəlxalq Peşə Ustalığı Yarışmasında 60-dək gənc energetik iştirak edir.

11:54

"Azərişıq" ASC-nin təşkilatçılığı ilə oktyabrın 17-dən 20-dək Hadrutda Ümummilli Lider Heydər Əliyevin 100 illik yubileyinə həsr olunmuş Türkdilli dövlətlərin gənc energetikləri arasında “Paylayıcı Şəbəkələrin Rəqəmsal Transformasiyası” mövzusunda I Beynəlxalq Peşə Ustalığı Yarışması keçirilir.

AZƏRTAC xəbər verir ki, yarışda Azərbaycan, Türkiyə, Qazaxıstan, Özbəkistan, Qırğızıstan və Tatarıstan nümayəndələri iştirak edirlər. Hər ölkədən 1 komanda, Türkiyədən isə 2 komanda mübarizə aparır.

Ümumilikdə, “Paylayıcı Şəbəkələrin Rəqəmsal Transformasiyası” mövzusunda I Beynəlxalq Peşə Ustalığı Yarışmasında 60-dək iştirakçı yarışır.