Azərbaycanın sərbəst güləşçisi, üçqat dünya və dördqat Avropa çempionu Hacı Əliyev (65 kiloqram) sentyabrın 16-dan 24-dək Serbiyanın paytaxtı Belqradda keçiriləcək dünya çempionatından öncə AZƏRTAC-a müsahibə verib.

Serbiyada keçiriləcək dünya çempionatına 10 gündən az vaxt qalıb. Yarışa hazırlıq prosesi barədə nə deyə bilərsiniz? Mundiala nə dərəcədə hazırsınız?

- Dünya çempionatı ilin son və ən vacib yarışıdır. Mundial həm də “Paris-2024” Yay Olimpiya Oyunlarına lisenziya qazandırır. Əlimizdən gələni edəcəyik ki, lisenziya qazanaq və Olimpiya oyunlarında ölkəmizi layiqincə təmsil edək. Bütün il boyu təlim-məşq toplanışlarında iştirak etmişik. Hətta bir neçəsi ölkə xaricində olub. Hazırda da məşqlərimiz davam edir, hər gün hazırlaşırıq. Lakin hava şəraitinin isti keçməsi məşq prosesinə təsir edir.