“IV Baku Piano Festival” çərçivəsində “Rotunda Roof Garden” məkanında Gürcüstanın Zaza Xuçişvili band qrupu və vokalçı Salome Qoçiridzenin iştirakı ilə rok-konsert keçirilib.

AZƏRTAC xəbər verir ki, konsertdə Zaza Xuçişvili, Salome Qoçiridze, Georgi Makalatia, Avtandil Tabukaşvili və Regina Meyrabova çıxış ediblər.

Gürcüstanın tanınmış rok musiqiçisi Zaza Xuçişvili gitaraçı və vokalçı kimi parlaq, fərqli üslubu ilə seçilir. Salome Qoçiridze isə caz, blüz, soul və fank janrlarında fəaliyyət göstərən vokalçıdır və tamaşaçılarla canlı emosional əlaqə yaratmağı bacarır.

AZƏRTAC-ın müxbiri ilə söhbətində gürcü musiqiçilər konsertdən əvvəlki təəssüratlarını bölüşüblər: “Biz hər dəfə Bakıya böyük həvəslə gəlirik. 2001-ci ildən bəri burada çıxış edirik və bizi həmişə səmimi qarşılayırlar. Bu il “Baku Piano Festival”da iştirak edirik, lakin rok ifa edirik. Bu axşam üçün xüsusi olaraq bizə Tbilisi Konservatoriyasını bitirmiş bir pianoçu da qoşulub. Ona görə də bu dəfə bir qədər fərqli formatda çıxış edəcəyik. Ümid edirik ki, dinləyicilər bəyənəcək. Konsert qabağı əhvalımız əladır”.

“IV Baku Piano Festival” iyunun 28-dək davam edəcək. Festival çərçivəsində paytaxt sakinləri və qonaqları müxtəlif janrlarda zəngin konsert proqramı gözləyir. Festival çərçivəsində, həmçinin incəsənət tədbirləri, sərgilər, ədəbi müsabiqə və cem-seyşnlər də keçiriləcək. Festivalın xüsusi qürur mənbəyi isə gənc istedadların təqdim olunacağı “We Are the Future” (“Biz gələcəyik”) konsertidir.