Aprelin 14-də Azərbaycandakı Atatürk Mərkəzində görkəmli ictimai xadim, yazıçı və maarifçi Nəriman Nərimanovun anadan olmasının 155 illiyi münasibətilə tədbir keçirilib.

AZƏRTAC xəbər verir ki, Nəriman Nərimanovun xatirə muzeyi və “Borçalı cəmiyyəti” İctimai Birliyinin birgə təşkilatçılığı ilə reallaşan tədbirdə əvvəlcə iştirakçılar böyük mütəfəkkirin abidəsini ziyarət edərək önünə əklil və gül-çiçək dəstələri qoyublar.

“Nəriman Nərimanov: şəxsiyyət və zaman” adlı tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Azərbaycanın azadlığı uğrunda canını fəda etmiş şəhidlərin xatirəsi bir dəqiqəlik sükutla yad edilib.

Tədbirdə çıxış edən Azərbaycan Respublikasının Prezidenti yanında Dövlət İdarəçilik Akademiyasının Tarix kafedrasının müdiri, dosent Firdovsiyyə Əhmədova Nəriman Nərimanovun həyat və fəaliyyətindən danışıb. O bildirib ki, Nərimanov ömrünün böyük hissəsini qəlbən inandığı xalq işi uğrunda mübarizəyə həsr edib: “O, xalqın taleyini müqəddəs amal kimi görürdü. Milli maraqları daim üstün tutan rəhbər kimi taleyüklü məsələlərdə xalqımızın mənafeyini sonadək müdafiə edib. Elmin, maarifin və mədəniyyətin inkişafı üçün əlindən gələni əsirgəməyib. Eyni zamanda, dövrünün milli məfkurə daşıyıcılarına ehtiram və qayğı ilə yanaşıb”.

Kulturoloq, Elm və Təhsil Nazirliyi yanında İctimai Şuranın üzvü Fuad Məmmədov deyib: “Nəriman Nərimanov Azərbaycan ziyalılığının ən gözəl nümunələrindən biridir. O, həm yüksək mədəniyyətə malik, həm də sosialist və milli dəyərləri özündə birləşdirən bir şəxsiyyət olub. Onun yüksək mənəviyyatının iki əsas mənbəyi vardı: ailəsi və təlim-tərbiyə aldığı mühit. Bu amillər onun böyük şəxsiyyət kimi formalaşmasında mühüm rol oynayıb”.

Tədbirdə “Borçalı cəmiyyəti” İctimai Birliyinin sədri Ramiz Həsənov, tanınmış siyasi və dövlət xadimi Həsən Həsənov, şair, yazıçı və publisist, professor Hamlet İsaxanlı, tarix elmləri doktoru, professor Solmaz Rüstəmova-Tohidi və digər natiqlər görkəmli şəxsiyyətin yaradıcılığı barədə öz fikirlərini bölüşüblər.

Tədbir çərçivəsində “Nəriman Nərimanov dövrünün böyük mütəfəkkiridir” adlı sərgi nümayiş olunub. Sonda Nəriman Nərimanovun “Ucqarlarda inqilabımızın tarixinə dair”, “Hacı Zeynalabdin Tağıyevin 50 illiyi: Məişətə və cəmaətə xidmətləri”, “Tibb və İslam” adlı əsərləri tədbir iştirakçılarına hədiyyə edilib.