İyunun 24-də Gəncliyə Yardım Fondunun təşkilatçılığı ilə mayın 18-21 tarixləri arasında reallaşan Azərbaycan və Türkiyə xanımlarının birgə əməyinin bəhrəsi olan “Əmanətə sahib çıx" adlı ənənəvi XVIII əl işləri xeyriyyə sərgisinin yekun mərhələsi olan hədiyyələrin təqdimat mərasimi keçirilib.

AZƏRTAC xəbər verir ki, 26 İyun - Azərbaycan Respublikası Silahlı Qüvvələri Gününə həsr edilən tədbirdə torpaqlarımızın azadlığı uğrunda canlarını fəda edən şəhidlərimiz bir dəqiqəlik sükutla yad edilib və Dövlət Himni və Türkiyə Cümhuriyyətinin İstiqlal marşı səsləndirilib.

Gəncliyə Yardım Fondunun rezidenti Ahmet Tecim, Türkiyənin ölkəmizdəki səfiri Cahit Bağçı, Bakı Şəhər Gənclər İdman Baş İdarəsinin rəisi Rafiq Abbasov, Zəfər Şəhid Ailələrinə Dəstək İctimai Birliyinin sədri Sevinc Alızadə və Milli Məclisin deputatı Anar İsgəndərov çıxış edərək şəhidlərimizin Vətən uğrunda canlarını qurban verərək göstərdikləri şücaətdən bəhs edib və onların övladlarına gələcək həyatlarında uğurlar arzulayıblar.

Sonra “Əmanətə sahib çıx” layihəsi çərçivəsində keçirilən xeyriyyə sərgisindən əldə olunan vəsaitlə ilkin mərhələ olaraq 17-i qız, 15-i oğlan uşağı olmaqla 32 şəhid övladına velosipedlər təqdim edilib.

Qeyd edək ki, hər il ənənəvi olaraq Gəncliyə Yardım Fondunun təşkilatçılığı ilə baş tutan xeyriyyə sərgisindən əldə olunan vəsaitlə bir çox xeyriyyə layihələri həyata keçirilir.