Azərbaycan Respublikasının Gənclər Fondu gənclər təşkilatlarının layihələrinin maliyyələşdirilməsi üzrə fevralın 10-dan martın 10-dək keçirilən növbəti müsabiqənin nəticələrini elan edib.

Gənclər Fondundan AZƏRTAC-a bildiriblər ki, bu qurumun Müşahidə Şurasının tapşırığına əsasən, layihələr mövcud vəziyyətə (koronavirus pandemiyası) uyğunlaşdırılmalı və onlayn formatda həyata keçirilməlidir. Bu tələblərə cavab verən 32 layihə təklifi müsabiqəyə təqdim edilib. Qiymətləndirmədən sonra 18 yerli və 1 beynəlxalq layihənin dəstəklənməsi məqsədəuyğun hesab edilib.

Müsabiqə qaliblərinin siyahısı Gənclər Fondunun rəsmi internet saytında (www.youthfoundation.az) yerləşdirilib.

Qrantın alınması məqsədilə bu gündən etibarən müsabiqədə qalib olmuş hər bir gənclər təşkilatı Gənclər Fondunun rəsmi internet saytına öz kod və şifrəsi ilə daxil olaraq müqavilənin elektron şəkildə razılaşdırılmasını həyata keçirə bilərlər. Azərbaycan Respublikası Gənclər Fondunun qrant müsabiqələri çərçivəsində gənclər təşkilatı ilə Gənclər Fondu arasında qrant müqaviləsinin bağlanması üçün elektron sistemə daxil olduqdan sonra Xidmətlər bölməsindən istifadə edərək Müqavilə pəncərəsinə keçid edilməlidir.

Qrantın alınması məqsədilə müqavilələrin imzalanması üçün sənədlərin göndərilməsi üçün son tarix iyulun 10-u müəyyən olunub.