Azərbaycan Prezidenti, Rusiya Prezidenti və Ermənistanın baş nazirinin noyabrın 10-da imzaladığı birgə bəyanata uyğun olaraq Kəlbəcər rayonu Ermənistan silahlı birləşmələri tərəfindən tam boşaldılıb və Azərbaycan ordu hissələri əraziyə daxil olub. Prezident, Müzəffər Ali Baş Komandan İlham Əliyev Kəlbəcər rayonunun işğaldan azad olunması münasibətilə Azərbaycan xalqına müraciət edib və xalqını təbrik edib. Bu tarixi hadisə xalqımız tərəfindən xüsusən də kəlbəcərlilər tərəfindən böyük coşqu və sevinc hissi ilə qeyd edilir.

AZƏRTAC-ın bölgə müxbiri xəbər verir ki, doğma rayonlarının 27 ildən sonra işğaldan azad edilməsinə sevinən kəlbəcərlilər Gəncə şəhərində salınmış yeni qəsəbənin mərkəzinə toplaşıb, şanlı qələbənin sevincini yaşayıblar. Əllərində Azərbaycan bayrağı və müxtəlif şüarlar tutmuş kəlbəcərlilər bir-birini təbrik edib, doğma yurdlarının, el-obalarının işğaldan azad olmasını bayram ediblər. Hər tərəfi “Qarabağ”, “Qarabağ Azərbaycandır”, “Kəlbəcər Qarabağdır”, “Yaşasın Ali Baş Komandan!”, “Biz Kəlbəcərə qayıdırıq”, "Yaşasın Azərbaycan Ordusu" kimi şüarlar bürüyüb.

Rayon sakinləri, kəlbəcərlilər sevinclərini AZƏRTAC-a bölüşüblər.

Xanəndə, Əməkdar artist Babək Niftəliyev: “Kəlbəcərin işğaldan azad olunması hər birimizin qələbəsidir. Bu sevinci bizə yaşatdığına görə Müzəffər Ali Baş Komandanımıza və rəşadətli ordumuza minnətdarıq. Vətən uğrunda canından keçən bütün şəhidlərimizə Allah rəhmət etsin. Bütün şəhidlərin valideynlərinə başsağlığı verirəm, onlara səbir diləyirəm. Yaralı əsgərlərimizin isə tezliklə sağlıqlarına qovuşmalarını arzulayıram. Dünən Murov dağı yaxınlığında idik. Gördüm ki, Silahlı Qüvvələrimizə məxsus zirehli texnika və şanlı ordumuzun əsgərləri böyük ruh yüksəkliyi ilə Toğana istiqamətindən Kəlbəcərə yola düşdülər. Bu o deməkdir ki, Kəlbəcər Azərbaycandır. Bir kəlbəcərli kimi özümü xoşbəxt sayıram və bu münasibətlə xalqımızı təbrik edirəm.

Ellada Qasımova: "Həyatımın ən sevincli günüdür. 27 illik həsrətimiz bitir. Bu sevinci bizə Müzəffər Ali Baş Komandanımız, Ordumuz yaşadır. Prezident İlham Əliyevə, Azərbaycan Ordusuna minnətdarlığımı bildirirəm. Yaşasın Azərbaycan. Yaşasın Azərbaycan Ordusu”.

Hikmət Bağırov: “Bir kəlbəcərli gənc olaraq çox qürurluyam. Çünki Müzəffər Ali Baş Komandanımız İlham Əliyevin və rəşadətli Azərbaycan ordusunun səyi nəticəsində heç vaxt görmədiyim. Amma illərlə həsrətini çəkdiyim ata-baba yurdum olan Kəlbəcər işğaldan azad olunub. Tezliklə Kəlbəcərə qayıdacağıma görə bütün kəlbəcərlilər kimi mən də çox sevincliyəm və özümü xoşbəxt hesab edirəm. İnşallah, bundan sonra biz öz doğma yurdumuzda yaşayacağıq və Kəlbəcəri tikib-quracağıq.

Gözəl Nəcəfova: “Kəlbəcəri tərk edəndə 53 yaşım vardı. 27 il yurd həsrəti ilə yaşamışam. Zirvəsi qarlı, yamacı güllü-çiçəkli yaylaqlarım üçün çox darıxmışam. 80 yaşım olsa da, dağ döşünə qalxmaq, bulaqların suyundan içmək istəyirəm. Kəlbəcərimizdə bitən otların, çiçəklərin ətrini qoxlamaq istəyirəm. Bu gün mənim ən xoşbəxt günümdür. Çünki hər daşı, hər qayası bir bayatı olan doğma Kəlbəcərimə qayıdıram. Bu xoş günləri bizə yaşadan Prezidentimiz İlham Əliyevə təşəkkürümü bildirirəm”.