Bakıda keçirilən batut gimnastikası üzrə dünya kuboku çox peşəkar və yüksək səviyyədə təşkil olunub.

Bunu AZƏRTAC-a Beynəlxalq Gimnastika Federasiyasının (FIG) batut gimnastikası üzrə Texniki Komitəsinin üzvü Tatyana Şuiskaya bildirib.

“Texniki nümayəndə kimi mən son üç ay ərzində yerli təşkilat komitəsi ilə çox fəal əməkdaşlıq etmişəm. Azərbaycan Gimnastika Federasiyası yarışı çox peşəkarcasına təşkil edib, yerli təşkilat komitəsi həmişə bütün qaydaları dərindən araşdırır, könüllülər də yaxşı hazırlanıblar. Deyə bilərəm ki, kubok həmişə olduğu kimi yüksək səviyyədə təşkil olunub. Azərbaycan Gimnastika Federasiyasına çox təşəkkür edirəm ki, belə yarışlar keçirir, məhz belə təşkilatçıları gözləyirik, bizə belə təşkilatçılar lazımdır”, - deyə Tatyana Şuiskaya qeyd edib.

Azərbaycan idmançısı Selcan Maqsudovanın hazırlıq səviyyəsindən danışan batut gimnastikası üzrə Texniki Komitənin üzvü onun çox güclü idmançı olduğunu vurğulayıb: “O, gənc, güclü idmançıdır, onun böyük imkanları və potensialı var. Ümid edirəm ki, o, bu yarışlarda özünü tam şəkildə reallaşdıra biləcək”.

Qaydalardakı yeniliklərlə əlaqədar yarışın formatının da dəyişdiyini vurğulayan Tatyana Şuiskaya deyib: “Bu ildən idmançılar əvvəllər batut gimnastikasında olmayan imkan əldə ediblər. Əvvəllər, məsələn, gimnast məşq zamanı yıxılırdısa, o, yarışdan kənarlaşdırılırdı. İndi təsnifat mərhələsindəki ən yaxşı nəticəyə görə növbəti mərhələyə keçirlər".

Qeyd edək ki, batut gimnastikası üzrə dünya kuboku fevralın 12-13-də Bakıda Milli Gimnastika Arenasında keçirilir. Yarışda Azərbaycanı milli komandanın üzvü Selcan Maqsudova təmsil edir.

Azərbaycan Gimnastika Federasiyasının 2022-ci ildə təşkil etdiyi ilk beynəlxalq yarışlarda dünyanın 13 ölkəsindən 60-a yaxın idmançı təmsil olunur. Yarışlar Beynəlxalq Gimnastika Federasiyasının (FIG) yeni qaydalarına uyğun keçirilir.

İki gün davam edəcək yarışın nəticələrinə əsasən, kişilər və qadınlar arasında fərdi proqram və sinxron tullanmalar üzrə qaliblər müəyyənləşəcək. Bundan əlavə, ənənəvi olaraq “AGF Trophy” kuboku təqdim olunacaq.

Yarışlar Azərbaycan Nazirlər Kabinetinin xüsusi icazəsi əsasında və ölkədə qüvvədə olan karantin qaydalarına, sanitar-epidemioloji tələblərə uyğun və tamaşaçıların iştirakı olmadan keçirilir.