×
Noyabrın 7-də Beynəlxalq Muğam Mərkəzində (BMM) Fidan Hacıyeva Vokal Musiqi Məktəbinin 5 illiyinə, qadınlardan ibarət "Mezzo" adlı ilk orkestrin isə 1 illik fəaliyyətinə həsr edilən konsert təşkil edilib.
AZƏRTAC xəbər verir ki, gecədə xalqımızın qazandığı tarixi Zəfərdən və belə möhtəşəm günlərdə keçirilən tədbirlərin əhəmiyyətindən danışılıb.
Səhnəyə dəvət olunan Azərbaycan Dövlət Akademik Opera və Balet Teatrının solisti, Xalq artisti Fidan Hacıyeva konserti dahi Üzeyir Hacıbəylinin “Sevgili canan” romansı ilə açıb.
Bütün iştirakçılara təşəkkürünü bildirən Xalq artisti Azərbaycan xalqının tarixində mühüm yer tutan 8 Noyabr - Zəfər Günündən danışıb və Ali Baş Komandan İlham Əliyevin rəhbərliyi ilə rəşadətli Ordumuzun qazandığı tarixi Qələbə münasibətilə hər kəsi təbrik edib.
Sonra Xalq artisti yaratdığı Vokal Musiqi Məktəbinin fəaliyyəti barədə məlumat verərək deyib: “Musiqi məktəbi 5 illik fəaliyyətində pandemiya dövrünü çıxmaq şərti ilə demək olar ki, hər ay konsert proqramları keçirərək klassik musiqini təbliğ edib. Bu məktəb Mədəniyyət Nazirliyi tərəfindən təsdiqlənmiş ilk özəl 5 və 7 illik Vokal Musiqi Məktəbidir. Məktəbdə musiqinin bir çox janrları üzrə dərslər keçirilir. Bu dərsləri Azərbaycanın peşəkar musiqi sənətinin nümayəndələri tədris edirlər. Bu gün bu tədbirdə iştirak edən tələbələr həmin peşəkar müəllim heyətinin yetirmələridir”.
Dünya bəstəkarlarının əsərlərini böyük ustalıqla ifa edən, bir çox beynəlxalq müsabiqələrin laureatı Xalq artisti Fidan Hacıyeva onu da bildirib ki, bu məktəbi yaratmaqda əsas məqsəd opera sənətinin sirlərini tələbələrinə ötürməkdir.
Bu ildən Milli Konservatoriyada Vokal müəllimi kimi fəaliyyət göstərən F.Hacıyeva deyib: “Mənim təsis etdiyim musiqi məktəbini bitirən tələbələr Milli Konservatoriyaya qəbul olaraq təhsillərini daha da təkmilləşdirirlər”.
Vokal Musiqi Məktəbində 6 yaşından başlayaraq uşaqlar, yeniyetmələr, gənclər, böyüklər sənətin sirlərini öyrənirlər.
“Həmişə arzu etmişəm ki, davamçılarımız olsun, Azərbaycan və dünya bəstəkarlarının əsərlərini həm ölkəmizdə, həm də xaricdə tanıtsınlar”, - deyə Fidan Hacıyeva bildirib.
Qeyd edək ki, məktəbin tələbələri sırasında musiqi təhsili olanlarla yanaşı, ayrı-ayrı sahələrdə çalışan, lakin vokal ifanı sevən, bu sənəti gələcəkdə davam etdirmək istəyənlər də var.
Tədbir Fidan Hacıyeva Vokal Musiqi Məktəbinin və qadınlardan ibarət "Mezzo" adlı ilk orkestrin parlaq ifaları ilə davam edib. Fidan Hacıyevanın çıxışından ruhlanan məktəbin tələbələri bir-birinin ardınca səhnədə öz məharətlərini göstərdilər.
Xalq artisti Fidan Hacıyevanın tələbələri ilə duetləri konsert proqramının ən yaddaqalan məqamlarından olub.
Beləliklə, konsert proqramı Fidan Hacıyevanın istedadlı yetirmələrinin timsalında salona əsl Zəfər əhvali-ruhiyyəsi bəxş edib.
Sonda Fidan Hacıyeva Vokal Musiqi Məktəbi kollektivinin birgə ifa etdiyi “Azərbaycan” mahnısını tamaşaçılar ayaq üstə alqışlayıblar