Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidmətinin fəaliyyəti ilə bağlı mediatur təşkil olunub.

AZƏRTAC xəbər verir ki, tədbirdə FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin rəis müavini, daxili xidmət polkovniki Fəxrəddin Məmmədov media nümayəndələrini xidmətin fəaliyyəti barədə məlumatlandırıb. Qeyd edilib ki, Dövlət Xidməti Azərbaycan Respublikasının daxili dəniz və ərazi sularında, çaylarında, su anbarlarında, digər sututarlarında kiçikhəcmli gəmilərin təhlükəsiz hərəkətinə dövlət nəzarətini, kiçikhəcmli gəmilərin və onların dayanacağı üçün bazaların, qurğuların, yanalma körpülərinin və su keçidlərinin təhlükəsiz istismarına texniki nəzarəti, çimərliklərdə, su hövzələrində və digər sututarlarda, dənizkənarı kütləvi istirahət yerlərində axtarış-xilasetmə tədbirlərini, habelə dalğıc-axtarış işlərini, insanların sularda təhlükəsizliyinin təmin edilməsi sahəsində idarəetməni, əlaqələndirməni və nəzarəti həyata keçirir.

FHN-in Kiçikhəcmli Gəmilərə Nəzarət və Sularda Xilasetmə Dövlət Xidməti kiçikhəcmli gəmi sürücülərinin hazırlığı üzrə kursları bitirmiş şəxslər üçün imtahan təşkil edir və imtahandan müvəffəqiyyətlə keçmiş şəxslərə sürücülük vəsiqəsi verir. Həmçinin dalğıc və xilasedicilərin hazırlanmasını, onların peşə hazırlığının yüksəldilməsi üçün müvafiq tədbirlər görür, eyni zamanda, kiçikhəcmli gəmilərin dayanacaq bazalarının, yanalma körpülərinin, su keçidlərinin, eləcə də çimərliklərin texniki baxışdan keçirilməsini təmin edir.

Xidmət insanların su obyektlərində təhlükəsizliyini təmin etmək məqsədi ilə əhali arasında maarifləndirmə işi aparır və bu sahədə aidiyyəti qurumların fəaliyyətini əlaqələndirir. Çimərlik mövsümünə hazırlıqla əlaqədar dalğıc və xilasedicilər peşəkarlıq səviyyələrinin artırılması məqsədilə ixtisasartirma kurslarına cəlb olunurlar. Həmçinin Xidmətin nəzarət etdiyi çimərliklərdə kompleks təhlükəsizlik tədbirləri görülür, dalğıclar vasitəsilə sualtı baxışlar keçirilir və bu proses zamanı aşkarlanmış təhlükəli ərazilərdə qadağanedici nişanlar quraşdırılır. Ölkə ərazisində mövcud çimərliklərdə, sahilboyu ərazilərdə və orada fəaliyyət göstərən özəl istirahət obyektlərində insanların sularda təhlükəsizliyini təmin etmək və nəzarəti həyata keçirmək məqsədilə yerli icra orqanlarının iştirakı ilə monitorinqlər təşkil olunur.

Nazirliyin Kiçik Həcmli Gəmilərə Nəzarət və Sularda Xilasetmə Dövlət Xidmətinin rəis müavini, Daxili Xidmət kapitanı Kamal Xanlarov jurnalistlərə müsahibəsində bildirib ki, 2021-ci ildə Dənizkənarı Milli Park ərazisində intihara cəhd edən dörd nəfər (iki kişi və iki qadın) xilas edilib.