Yanvarın 13-də Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyinin S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutunun Sertifikat-Sınaq Mərkəzinə mediatur təşkil olunub.

AZƏRTAC xəbər verir ki, mediatur zamanı institutun dünya standartlarına uyğun ən müasir avadanlıq və sınaq texnologiyalarından ibarət laboratoriyalarla təchiz olunduğu bildirilib.

FHN-in “Materialların yanğın təhlükəsizliyi” laboratoriyasının müdiri Kamil Mustafayev məlumat verib ki, institutda müasir avadanlıq və sınaq texnologiyalarından istifadə edilməklə tikintidə mövcud inşaat materiallarının müayinə-sınaq işləri, müxtəlif təyinatlı bina və qurğuların müayinəsi, eləcə də onların seysmik dayanıqlılığının qiymətləndirilməsi, materialların yanğın təhlükəsizliyinin təyini, geoloji-axtarış və digər işlər həyata keçirilir. İnstitutda fəaliyyət göstərən laboratoriyalar AZS ISO/IEC 17025:2020 “Sınaq və kalibrləmə laboratoriyalarının səlahiyyətliliyinə ümumi tələblər” standartına uyğun akkreditasiya olunub.

K.Mustafayev qeyd edib ki, institutun Müayinə və İnşaat Materiallarının Sınağı üzrə Sertifikat-Sınaq Mərkəzinin tərkibində “Materialların yanğın təhlükəsizliyi”, “Fiziki-kimyəvi analiz”, “Təbii və keramik divar daşları, üzlük materialları”, “Beton və dəmir-beton texnologiyası və qatqıları”, “Asfalt-asfaltbeton”, “Bina və qurğuların elektrik təchizatının müayinəsi”, “Mühəndis geologiyası”, “İnşaatda ekoloji problemlər”, “Mülki və sənaye tikintisi” və digər ixtisaslaşmış tikinti laboratoriyaları, eləcə də 4 regional müayinə-sınaq laboratoriyası fəaliyyət göstərir.

“Materialların yanğın təhlükəsizliyi” laboratoriyasının fəaliyyət istiqaməti tikinti materiallarının və məhsulların yanğına davamlılığının öyrənilməsi və standart üsulların tələblərinə uyğun dəqiq sınaq nəticələrinin aparılmasına yönəlib. Laboratoriyanın əməkdaşları xarici ölkələrdə təlim keçib və müvafiq sertifikatlar alıblar. Laboratoriyada yanğın qruplarının müəyyənləşdirilməsi, alovun yayılma sürətinin, tüstü əmələgətirmə əmsalının, alovlanma və alışma temperaturun təyini kimi sınaqlar aparılır.

“Fiziki-kimyəvi analiz” laboratoriyanın əməkdaşı Zümrüd Əliyeva deyib ki, laboratoriya Türkiyə və Avropa istehsalı olan avadanlıqla təchiz edilib. Quraşdırılan optik və rentgen spektrometrləri metal, filiz, sement, çınqıl və s. nümunələrin analizə hazırlığını, analizin aparılmasını və materialın kimyəvi tərkibi haqqında dəqiq məlumatın alınmasını təmin edir. Bundan başqa, yeni rentgen cihazı (SPECTRO XEPOS) və unikal proqram təminatı (Turbo Quant) vasitəsilə laboratoriyada qısa zamanda istənilən naməlum maye, toz və bərk nümunələrini analiz etmək mümkündür.

“Təbii və keramik divar daşları, üzlük materialları” laboratoriyası çoxmərtəbəli, eləcə də sənaye binalarının inşası zamanı əsas yükdaşıyan və öz yükünü qəbul edən konstruksiyaların hazırlanmasında istifadə olunan tikinti materiallarının öyrənilməsində və istehsalatda tətbiqində mühüm rol oynayır. Burada təbii xammallar kimi dağ süxurları, çöküntü süxurları əsasında alınan divar daşlarının, dekorativ üzlük tavaların xassələrinin müasir sınaq üsulları ilə öyrənilməsi, məhsulun tikintidə tələb olunan layihəyə uyğunluğunun müəyyənləşdirilməsi və istehsalatda tətbiqi təmin olunur.

“Beton, dəmir-beton texnologiyası və qatqıları” laboratoriyası beton sınaqları, konstruksiyaların müayinələri, beton və dəmir-beton texnologiyası sahəsində müxtəlif tədqiqatlar və konsaltinq xidmətləri göstərir. Tədqiqat və sınaq işləri daim genişləndirilir, testlərin həyata keçirilməsi təmin olunur. Konstruksiya, qurğu və binaların müayinəsi ən müasir metodlarla həyata keçirilir. Müayinə metodlarının təkmilləşdirilməsi və genişləndirilməsi, sınaq metodlarında Avropa standartları və digər müasir normativ-texniki sənədlərin mənimsənilməsi işi aparılır.

“Asfalt-asfaltbeton” laboratoriyası respublikada inşa edilən beynəlxalq və ölkədaxili avtomobil yollarının tikintisində istifadə olunan inşaat materiallarının keyfiyyət göstəricilərinin layihə tələblərinə, eləcə də qüvvədə olan norma və tələblərə uyğunluğunun yoxlanılmasında iştirak edir. Layihələrdə istifadə edilən inşaat materiallarının keyfiyyət göstəriciləri müasir avadanlıq və sınaq texnologiyalarından istifadə edilməklə sahə və laboratoriya şəraitində yoxlanılır.

“Mülki və sənaye tikintisi” laboratoriyası tikintinin müxtəlif sahələrində istifadə edilən inşaat materiallarının keyfiyyət göstəricilərinin öyrənilməsi, onların daha da yaxşılaşdırılması üçün təkliflərin hazırlanması, tikintiyə yeni mütərəqqi materialların cəlb olunması istiqamətində işlər aparır.

“Bina və qurğuların elektrik təchizatınin müayinəsi” laboratoriyası yaşayış komplekslərində, habelə dövlət əhəmiyyətli obyektlərdə elektrik təsərrüfatının müayinə-sınaq işlərini realizə edir. Laboratoriyada baş və digər paylayıcı lövhələrə qədər mövcud torpaqlanma sisteminin yoxlanılması, kabellərin diaqnostikası, avtomat açarların və elektrik avadanlığının yoxlanması, işıqlandırma dərəcəsinin ölçülməsi, ildırımötürücülərin torpaqlanma müqavimətinin ölçülməsi və s. istiqamətlərdə müayinələr aparılır. Burada, eyni zamanda, obyektlərdə müayinə-sınaq işlərinin aparılması üçün beynəlxalq standartlara cavab verən müasir cihaz və avadanlıqla təchiz olunmuş “Səyyar laboratoriya” mövcuddur.

“Mühəndis geologiyası” laboratoriyası qruntların fiziki-mexaniki xüsusiyyətlərinin təyinini, sınağını, qrunt tərkibinin dövlət və beynəlxalq ASTM, BS, TS standartlarına əsasən təsnifatı üçün onların xüsusiyyətlərini təyin edir. Laboratoriya ABŞ, Almaniya, Türkiyə, Rusiya və digər xarici ölkələrin yüksək dəqiqlikli avadanlığı ilə təchiz olunub. Burada mühəndis-geoloji axtarış işlərinə və qurğuların sınaqlarına dair elmi-tədqiqat işlərinin təşkili, lazimi texniki cihaz və avadanlığın hazırlanması və işlərin aparılması həyata keçirilir.