Türkiyədə meşə yanğınlarının söndürülməsi və daha geniş miqyas almasına imkan verilməməsi məqsədilə Azərbaycan Respublikasının Prezidenti İlham Əliyevin tapşırığına uyğun olaraq, qardaş ölkəyə yola salınan Fövqəladə Hallar Nazirliyinin (FHN) aviasiya dəstəsinin helikopteri Köyceğiz rayonunda yanğınların söndürülməsi işlərini böyük əzmkarlıqla davam etdirirlər.

AZƏRTAC-ın yanğın bölgəsinə ezam olunan müxbiri xəbər verir ki, Azərbaycan yanğınsöndürənləri Türkiyədə tüğyan edən meşə yanğınlarının söndürülməsində fədakarlıq göstərirlər. Avqustun 12-də FHN-in aviasiya dəstəsinin helikopteri Köycəğiz rayonu və Kavaklıdərə kəndində 28 uçuş həyata keçirib və əraziyə 70 ton su tökülüb.

Xatırladaq ki, qardaş ölkədə baş verən meşə yanğınlarının söndürülməsi üçün hazırda Türkiyədə FHN-in 743 əməkdaşı fəaliyyət göstərir. Bundan başqa, 97 texnika, o cümlədən 77 yanğınsöndürmə, 6 nasos avtomobili, 1 yanacaqdoldurma çəni, 4 qərargah avtomaşını, 2 avtobus və 1 pikap, eləcə də köməkçi texniki vasitələr, “BE-200ÇS” tipli amfibiya təyyarəsi və 1 helikopter Türkiyədə meşə yanğınlarının söndürülməsinə cəlb olunub. Bu qüvvələr Muğla vilayətinin Köyceğiz rayonunun Pınar və Çayhisar kəndlərində yanğınların yayılmasının qarşısını alıblar. FHN-in əməkdaşları həmin kəndlərdə dağlıq ərazilərdə yanğınların söndürülməsi və alovun evlərə yaxınlaşmasının qarşısını fədakarlıqla alıblar.