Fövqəladə Hallar Nazirliyinin (FHN) 112 - qaynar telefon xəttinin fəaliyyəti ilə tanışlıq məqsədilə media-tur təşkil olunub.

AZƏRTAC xəbər verir ki, media-turda jurnalistlərə nazirliyin 112 - qaynar telefon xəttinin Azərbaycan Respublikasının Prezidenti İlham Əliyevin “Azərbaycan Respublikası Fövqəladə Hallar Nazirliyinin fəaliyyətinin təşkil edilməsi haqqında” 2006-cı il 28 fevral tarixli Fərmanı ilə yaradıldığı bildirilib. Qeyd olunub ki, 112 - qaynar telefon xəttinin fəaliyyəti FHN-in Böhran Vəziyyətlərində İdarəetmə Mərkəzi tərəfindən təşkil olunur. Bu telefon xətti xilasetmə qurumlarının fövqəladə halların qarşısının alınması və nəticələrinin aradan qaldırılması üzrə fəaliyyətində, o cümlədən yanğınsöndürmə, axtarış-xilasetmə, qəza-xilasetmə istiqamətləri üzrə informasiya dəstəyini təmin edən vacib struktur bölməsidir. Eyni zamanda, 112 - qaynar telefon xətti Fövqəladə Hallar Nazirliyinin digər fəaliyyət istiqamətləri üzrə də telefon müraciətlərinin operativ cavablandırılmasını həyata keçirir.

Məlumat verilib ki, yanğınsöndürmə, qəza-xilasetmə, axtarış-xilasetmə və digər xilasetmə işlərinə zərurət yarandıqda 112 - qaynar telefon xəttinə zəng edilməlidir. Bu zəruri hallara yanğın, partlayış baş verdikdə, yaxud bu halların baş vermə ehtimalı, təbii fəlakətlər (zəlzələ, sel, daşqın, torpaq sürüşməsi və s.), su hövzələrində axtarış-xilasetmə işlərinin həyata keçirilməsi, evdə (mənzildə) bağlı qapı arxasında və ya hər hansı köməksiz vəziyyətdə qalma, yol-qəza hadisəsi nəticəsində köməksiz vəziyyətdə qalma, digər səbəblərdən köməksiz vəziyyətdə (yolu azanda, hava şəraiti ilə əlaqədar və s.) qalma, tikintidə və sənaye müəssisələrində qəza baş verdikdə və ya qəzaya səbəb ola biləcək hallar, partlayıcı maddə, silah-sursat və digər təhlükə potensiallı əşyalar (maddələr) aşkar olunması, civə dağılması (termometr sındıqda və s. hallarda) baş verməsi, hər hansı səbəbdən digər təcili xidmətlərlə (102, 103, 104) əlaqə yaratmaq mümkün olmaması aiddir. 112 - qaynar telefon xəttinə Azərbaycan Respublikası ərazisindən sabit və mobil (GSM və CDMA) telefonlardan, həmçinin telefon-avtomatlarından (taksafonlardan) ödənişsiz zəng etmək olar. GSM nömrə blok edildikdə, danışıq kartı, yaxud balans bitdiyi halda da 112 nömrəsinə zəng etmək mümkündür. Müraciətlərin qəbulu və cavablandırılması fasiləsiz həyata keçirilir.

Nazirliyin Böhran Vəziyyətlərində İdarəetmə Mərkəzinin rəis müavini, polkovnik-leytenant Əsmər Salamova bildirib ki, hər gün FHN-in fəaliyyət istiqamətlərinə aid məsələlərlə bağlı, o cümlədən yanğından mühafizə, qəza-xilasetmə, axtarış-xilasetmə, digər xilasetmə tədbirləri ilə əlaqədar, həmçinin nazirliyin səlahiyyətlərinə aid olmayan çoxsaylı zənglər qəbul olunur. Gün ərzində təqribən 6-7 min zəngin qəbul edildiyini deyən Ə.Salamova bildirib ki, bu da il ərzində 2 milyondan artıq zəng deməkdir. Təhlillər göstərir ki, qəbul edilən zənglərin təqribən 15-20 faizi əsaslıdır, 80 faizə yaxını isə əsassız və yalan məlumatlarla bağlıdır. 2016-cı ildə 112 - Çevik Reaksiya İdarəsinin inzibati bölməsində əsaslı təmir-yenidənqurma işləri aparılıb. Yenidənqurmadan sonra idarə ən müasir avadanlıqla təmin edilib, yeni nəsil proqram təminatının tətbiqinə başlanılıb, iş şəraiti xeyli yaxşılaşdırılıb.

“Yenidənqurma işlərindən sonra zənglərin qəbulu, operativ emalı və yönəldilməsi məqsədi ilə yeni, müasir proqram təminatı olan K3-dən istifadə olunur. K3 proqram təminatı sadədir, lakin çoxfunksiyalıdır. K3 proqram təminatı qurumlararası əlaqələndirmə və səmərəli informasiya mübadiləsini təmin edən avtomatlaşdırılmış idarəetmə sistemidir. Proqram təminatının imkanlarından istifadə etməklə zənglərin avtomatik qəbulu, qeydiyyatı və saxlanması, məlumatların elektron kartlara yazılması və saxlanması, zəng edənin yerinin xəritədə təyin olunması, çağırış ünvanına yaxın olan müvafiq qüvvələrin təyin edilməsi və sistem üzərindən cəlb olunması mümkündür. Bundan başqa, K3 proqram təminatı bazada informasiya axtarışının aparılmasını, müxtəlif hesabatların alınmasını və digər faydalı əməliyyatların yerinə yetirilməsini təmin edir” – deyə Ə.Salamova vurğulayıb.

Bundan başqa, 112 - qaynar telefon xətti zalında işçilərin iş şəraitinin yaxşılaşdırılması məqsədilə məhz çağrı mərkəzləri üçün nəzərdə tutulan xüsusi iş masaları quraşdırılıb. İşçinin boyuna görə tənzimlənə bilən bu masalar oturaq və ayaqüstü vəziyyətlərdə işləmək imkanı yaradır.

Bildirilib ki, yeni növ koronavirusun (COVID-19) səbəb olduğu pandemiyadan psixoloji sarsıntı keçirən vətəndaşlara 2020-ci ilin aprelindən etibarən 112 – qaynar telefon xətti vasitəsilə təcili psixoloji yardım təşkil olunub. Sonrakı dövrdə 44 günlük Vətən müharibəsi ilə əlaqədar psixoloji problemlər yaşayan vətəndaşlara, o cümlədən qazilərə, şəhid ailəsi üzvlərinə, ümumilikdə erməni terrorundan fiziki və mənəvi zərər görmüş insanlara psixoloji yardımın göstərilməsi təşkil olunub. Ötən dövrdə 7 mindən çox müraciət üzrə psixoloji yardım göstərilib.

Ölkəmizdə turizm sektorunun sürətli inkişafını, ilbəil ölkəyə səfər edən turistlərin sayının artdığını nəzərə alaraq, dünyada tanınmış olan təcili xilasetmə nömrələrinin 112 - qaynar telefon xətti sisteminə tanıdılmasına başlanıb. İlkin olaraq, ABŞ və Kanada ərazisində istifadə olunan 911 xilasetmə nömrəsinin bu sistemə tanıdılması təmin edilib. Bu, o deməkdir ki, Azərbaycan Respublikası ərazisindən 911 nömrəsinə edilən zəng avtomatik olaraq Fövqəladə Hallar Nazirliyinin 112 - qaynar telefon xəttinə yönləndirilir. Gələcəkdə zərurət yaranarsa istənilən digər təcili xilasetmə nömrəsinin də 112 - qaynar telefon xətti şəbəkəsinə tanıdılması həyata keçirilə bilər.

“Dövlət orqanlarında çağrı mərkəzlərinin fəaliyyətinin təşkili Qaydaları”nın tələbləri nəzərə alınaraq, dispetçer-operator heyətinin nəzəri bilik səviyyəsinin artırılması, praktik bacarıqlarının inkişaf etdirilməsi məqsədilə mütəmadi məşğələlər keçirilir. Məşğələlərdə Fövqəladə Hallar Nazirliyinin fəaliyyəti ilə bağlı qanunvericilik aktları və digər normativ sənədlərin, həmçinin texniki vasitələrdən düzgün və səmərəli istifadə üsullarının öyrənilməsinə, peşə vərdişlərinin təkmilləşdirilməsinə xüsusi diqqət yetirilir. Eyni zamanda, əməkdaşlar hər il FHN-də təşkil olunan xarici dil kurslarına cəlb edilirlər.