Fövqəladə Hallar Nazirliyi (FHN) vətəndaşları binaların həyətlərində xüsusi təyinatlı texnikanın hərəkətini məhdudlaşdırmağa yol verməməyə çağırıb.

AZƏRTAC xəbər verir ki, bunu FHN-in Dövlət Yanğın Nəzarəti Xidmətinin əməkdaşı, kapitan Nurlan Qədimov jurnalistlərə müsahibəsində deyib.

O bildirib ki, Xidmətin təşəbbüsü və təşkilatçılığı ilə Nərimanov, Nizami və Xətai rayonu ərazisində metal dirəklərin basdırılması və ya beton plitələrin düzülməsi ilə yol və keçidlərin hərəkət hissəsi, eləcə də yanğın su mənbələrinə gedən yolların daraldılması və bağlanması aşkar edilib. Aparılmış qanunamüvafiq tədbirlər nəticəsində operativ nəqliyyat vasitələrinin hərəkətini məhdudlaşdıran həmin maneələrin aidiyyəti müəssisələr tərəfindən demontaj edilərək ləğv olunur. Belə tədbirlər mütəmadi olaraq həyata keçirilir. Sakinlərdən bir daha xahiş edirik ki, xüsusi təyinatlı texnikanın hərəkətinin məhdudlaşmasına yol verməsinlər.

Qeyd edək ki, binaların bilavasitə yaxınlığında müxtəlif ölçülü dirəklərin basdırılması, daş, beton parçaları və başqa vasitələrlə yolların hərəkət hissələrinin tutulması, daraldılması, həmçinin yaşayış binalarının yanğın keçidlərində yolların tam və ya qismən bağlanması, o cümlədən şlaqbaumların quraşdırılması baş verə biləcək fövqəladə hadisələr, eləcə də yanğınlar zamanı yanğınsöndürən və digər xüsusi təyinatlı texnikaların taktiki və texniki imkanlarını məhdudlaşdırır.