Fövqəladə Hallar Nazirliyinin (FHN) İctimaiyyətlə əlaqə idarəsinin və Dövlət Yanğından Mühafizə Xidmətinin birgə təşkilatçılığı ilə Bakı şəhərinin Şüvəlan qəsəbəsindəki Sağlamlıq imkanları məhdud uşaqlar üçün 2 nömrəli xüsusi internat məktəbində yanğın təhlükəsizliyinə dair təlim keçirilib.

AZƏRTAC xəbər verir ki, nazirliyin müvafiq canlı qüvvə və texnikasının cəlb edildiyi təlimin keçirilməsində məqsəd məktəbin kollektivinə yanğın zamanı davranış qaydalarının aşılanması olub.

FHN-in əməkdaşları təlimin nəzəri hissəsində məktəbin müəllim və şagirdlərinə fövqəladə hallar, o cümlədən yanğın zamanı zəruri davranış qaydaları barədə maarifləndirici məlumat veriblər. Videoçarx və slaydların müşayiəti ilə keçirilən maarifləndirici tədbirdə məktəblilərə fövqəladə hallarla bağlı davranış qaydaları barədə ətraflı məlumat verilib.

FHN-in İctimaiyyətlə əlaqə idarəsinin rəis müavini polkovnik Məhbubə Mustafayeva bildirib ki, təlimin keçirilməsində məqsəd fövqəladə hadisə baş verdikdə davranış qaydaları, o cümlədən təxliyə zamanı təhlükəsizliyin təmin olunması barədə müəllim və şagirdlərə zəruri nəzəri və praktiki biliklərin aşılanması, həmçinin uşaqlarda həyat fəaliyyətinin təhlükəsizliyi mədəniyyətinin formalaşdırılmasıdır. O, belə tədbirlərin Bakıda və regionlarda da təşkil olunduğunu qeyd edib.

İnternat məktəbinin direktoru Umnisə Nəcəfbəyova təlimin əhəmiyyətindən danışaraq Fövqəladə Hallar Nazirliyi tərəfindən həyata keçirilən maarifləndirmə tədbirlərini yüksək qiymətləndirdiyini diqqətə çatdırıb. Bu təlimin bütün uşaqlar üçün vacib olduğunu vurğulayan direktor əməkdaşlığa görə Fövqəladə Hallar Nazirliyinə təşəkkür edib.

Sonra təlimin praktiki hissəsinə start verilib. Tədbirdə şərti yanğın zamanı “Həyəcan” siqnalı verildikdən sonra FHN-in yanğınsöndürən və təcili tibbi yardım dəstələri təlimatda nəzərdə tutulmuş müddətdə hadisə yerinə çatıb. Şərti yanğın baş vermiş məktəbdə təxliyə planına uyğun olaraq, şagird və müəllimlərin təhlükəsiz yerə təxliyəsi həyata keçirilib, sinif otaqlarında qalmış məktəblilər xilas edilib, şərti xəsarət almış məktəblilərə ilkin tibbi yardım göstərilib.

Təlim uğurla başa çatıb və qarşıya qoyulmuş məqsədlərə nail olunub.