Yaşayış, eləcə də digər təyinatlı binaların həyətlərinə giriş-çıxışların və keçidlərin vətəndaşlar tərəfindən süni maneələrlə bağlanmasının qarşısının alınması məqsədilə Fövqəladə Hallar Nazirliyinin Dövlət Yanğın Nəzarəti Xidməti (FHN DYNX) tərəfindən qanunamüvafiq tədbirlər davam etdirilir.

AZƏRTAC xəbər verir ki, növbəti belə tədbir paytaxtın Nizami rayonu ərazisində baş tutub. Belə ki, DYNX tərəfindən Nizami rayonu C.Naxçıvanski küçəsi 47, C.Naxçıvanski küçəsi 49, C.Naxçıvanski küçəsi 55, B.Nuriyev küçəsi 27, B.Nuriyev küçəsi 169, Çobanzadə küçəsi 41, Q.Qarayev prospekti 125, Q.Qarayev prospekti 126 ünvanlarında reydlər keçirilib. Qurum tərəfindən vətəndaşlarla maarifləndirici söhbətlər aparılıb, yaşayış və digər təyinatlı binaların həyətlərinə giriş-çıxışların bağlanılmasının ciddi fəsadlara gətirib çıxara biləcəyi izah olunub.

FHN DYNX-in əməkdaşı Nurlan Qədimov jurnalistlərə müsahibəsində yanğınsöndürmə avtomobillərinin və qəza-xilasetmə texnikalarının hərəkətinə maneə yaradan faktların aşkarlanaraq aradan qaldırılması istiqamətində reydlərin mütəmadi keçirildiyini bildirib: “Yaşayış, eləcə də digər təyinatlı binaların həyətlərinə giriş-çıxışların və keçidlərin vətəndaşlar tərəfindən süni maneələrlə bağlanması ciddi fəsadlara yol açır. Binaların bilavasitə yaxınlığında müxtəlif ölçülü dirəklərin basdırılması, daş, beton parçaları və başqa vasitələrlə yolların hərəkət hissələrinin tutulması, daraldılması, həmçinin yaşayış binalarının yanğın keçidlərində yolların tam və ya qismən bağlanması, o cümlədən şlaqbaumların quraşdırılması baş verə biləcək fövqəladə hadisələr, eləcə də yanğınlar zamanı yanğınsöndürən və digər xüsusi təyinatlı texnikaların taktiki və texniki imkanlarını məhdudlaşdırır”.

O bildirib ki, bu ilin əvvəlindən indiyədək Nizami rayonu ərazisində 30-dan çox ünvanda bu cür işlər həyata keçirilib. Qurum rəsmisi vətəndaşları ictimai təhlükəsizlik qaydalarına riayət etməyə çağırıb.