Atıcılıq üzrə dünya kuboku ənənəvi yarışdır. Pandemiya zamanı keçirilməyib. Bakı Atıcılıq Mərkəzində baş tutan bu irimiqyaslı yarışda 66 ölkədən 700-dən artıq idmançı iştirak edir. Bu, dünya kuboku yarışı üçün böyük rəqəmdir.

AZƏRTAC xəbər verir ki, bu sözləri jurnalistlərə müsahibəsində Azərbaycanın gənclər və idman naziri Fərid Qayıbov bildirib. O qeyd edib ki, yarışların keçirildiyi və ən yüksək beynəlxalq tələblərə cavab verən Bakı Atıcılıq Mərkəzi birinci Avropa Oyunlarından əvvəl istifadəyə verilib: “Dünya kuboku yarışından öncə isə Azərbaycan Atıcılıq Federasiyası tərəfindən bəzi təmir işləri görülüb. Beynəlxalq Atıcılıq Federasiyasının prezidenti də buradadır. Qeyd etdiyim kimi, 66 ölkənin idmançılarının, nümayəndələrinin olması, bir neçə ölkədə yarışların canlı yayımlanması sübut edir ki, Azərbaycanda bu idman növü düzgün inkişaf edir. İnanıram ki, nəticələrimiz də yaxşı olacaq”.

Nazir turnirin yüksək səviyyədə təşkil edildiyinə toxunaraq söyləyib: “Dünya kuboku yarışı yüksək səviyyədə təşkil olunub. Ümumiyyətlə, Azərbaycanda bütün sahələr üzrə, eləcə də idman sahəsində nüfuzlu tədbirlər, yarışlar mütəmadi olaraq keçirilir. Ölkəmizdə idman yarışlarının təşkili üçün hər bir şərait var. Olimpiya Stadionu, Su İdmanı Sarayı, Milli Gimnastika Arenası və digər müasir tipli idman qurğularında ən böyük tədbirlərin keçirilməsi üçün bütün imkanlar mövcuddur. Ümumiyyətlə, təkcə Bakıda deyil, bölgələrimizdə də bir-birindən gözəl Olimpiya idman kompleksləri, mərkəzləri və digər idman qurğularında həm tədbirlərin təşkili, həm də gənc nəslin idmanla məşğul olması üçün lazımi şərait yaradılıb. Qəbələdə də atıcılıq üzrə dünya kuboku yarışı keçirilmişdi. Yəni, biz bölgələrdə də beynəlxalq səviyyəli turnirlər keçirə bilirik. Təlim-məşq toplanışları üçün də Azərbaycan yaxşı yerdir. Bakı Atıcılıq Mərkəzinə dünyanın müxtəlif ölkələrindən təlim-məşq toplanışına gələnlər də var. Bir sözlə, Azərbaycanda idmanın inkişafı üçün bütün imkanlar yaradılıb”.

Fərid Qayıbov Azərbaycanda atıcılığın ənənələrinin olduğunu da diqqətə çatdırıb. O, gələcəkdə bu idman növü üzrə yüksək nəticələrin əldə ediləcəyinə əmin olduğunu bildirib: “Bu idman növü üzrə Zemfira Meftahətdinova Olimpiya çempionu olub. Eləcə də Olimpiya mükafatçımız da var. Bir müddət nəticələrimiz olmadı. Atıcılığın inkişaf etdirilməsi üçün işlər görülür. Ruslan Lunyov bu il çox yaxşı nəticələr əldə edib. Amma doğma meydanda həyəcanlıdır. Onun hələ medal qazanmaq üçün şansı var və əminik ki, bacarığından maksimum istifadə edəcək. Komandamızın heyətində gənc atıcılarımız var. Onlar da bütün səylərini toplayıb mübarizə aparırlar”.