Azərbaycanda yaşlı əhali qrupunun iqtisadi aktivlik indeksi ilə bağlı metodologiya hazırlanaraq hökumətə təqdim edilib. Məqsəd ahılların evdə oturaraq yalnız nəvələri ilə vaxt keçirmələri tendensiyasını dəyişmək, cəmiyyətdəki müəyyən stereotipləri qırmaqdır. Yaşlıların aktivlik indeksi bizə onların hansı işlərin öhdəsindən gələ biləcəyini aydınlaşdırmağa kömək edəcək. Yaşlıların aktivlik indeksinin 2022-ci ildə Dövlət Statistika Komitəsi tərəfindən təqdim ediləcəyi ehtimal edilir. Növbəti illərdə indeks göstəricisi ilə dəyişimi müəyyən etmək mümkün olacaq.

AZƏRTAC xəbər verir ki, bunu BMT-nin Əhali Fondunun Azərbaycandakı nümayəndəliyinin rəhbəri Fərid Babayev Beynəlxalq Ahıllar Günü ilə əlaqədar Bakıda fəal və sağlam yaşlanma mövzusuna həsr olunmuş fotoşəkillərdən ibarət sərginin açılış mərasimindəki çıxışı zamanı deyib.

F.Babayev bildirib ki, statistikaya əsasən, Azərbaycanda yaşlıların sayı region ölkələri ilə müqayisədə daha azdır. On milyonluq əhalinin 35 faizini isə cavanlar təşkil edir. Ümumiyyətlə ölkənin yaşlı əhali qrupu arasında iqtisadi aktivliyin artırılması planlaşdırılır. Dövlətin 65 yaşdan yuxarı şəxslərin təqaüdə çıxmasını müəyyən etməsi ilə həmin şəxslərin iş fəaliyyətinə bir sıra məhdudiyyətlər tətbiq olunur. Məqsədimiz təqaüdə çıxan ahılların ekspert və ya konsultant kimi fəaliyyət göstərərək iqtisadiyyata dəstək vermələrini təmin etməkdir. Ahılların müxtəlif fəaliyyət tədbirlərinə qoşulması yaşlı əhali qrupunun passivliyini azaldacaq”.