FAO-Azərbaycan Tərəfdaşlıq Proqramı çərçivəsində iki yeni layihənin açılış seminarı keçirilir.

AZƏRTAC xəbər verir ki, seminarlar “Aqrar Xidmətlər Agentliyinin Struktur İslahatı və Strateji İnkişafına Dəstək” və “Toxum və Aqro–Kimyəvi Laboratoriyaların və Sertifikasiya Xidmətlərinin Təkmilləşdirilməsi” mövzusunda aparılır.

“Aqrar Xidmətlər Agentliyinin Struktur İslahatı və Strateji İnkişafına Dəstək” layihəsinin məqsədi yerli, regional və qlobal səviyyədə səmərəli və inklüziv ərzaq və kənd təsərrüfatı təchizat zəncirləri vasitəsilə dayanıqlı istehlak və istehsal nümunələrinin və dəyişən iqlim və ətraf mühitdə dayanıqlı aqro-ərzaq sistemlərinin təmin edilməsidir. Seminarda layihənin əhatə dairəsi və məqsədləri ilə əlaqədar məlumatlar çatdırılır və iş planı nəzərdən keçirilərək müzakirələr aparılır.

Müzakirələr zamanı layihə üçün əsaslandırma planı hazırlanacaq və müvafiq fəaliyyətlər görüləcək işlər siyahısına daxil ediləcək.

Tədbirin ikinci hissəsində “Toxum və Aqro–Kimyəvi Laboratoriyaların və Sertifikasiya Xidmətlərinin Təkmilləşdirilməsi” layihəsinin təqdimatı baş tutacaq. Təqdimat zamanı kənd təsərrüfatı, meşə təsərrüfatı və balıqçılıq sahələrinin daha məhsuldar və dayanıqlı hala gətirilməsinə dair müzakirələr aparılacaq. Dayanıqlı kənd təsərrüfatı və ərzaq təhlükəsizliyi sahəsində texniki dəstək, potensialın gücləndirilməsi, o cümlədən sertifikatlaşdırma, laboratoriyalarının və sortların yoxlanılması xidmətlərinin təkmilləşdirməsi layihənin əsas prioritetlərindən biridir.