Bu gün 44 günlük Vətən müharibəsi mövzusunu diqqətdən qaçırmaq mümkün deyil. İkinci Qarabağ münaqişəsində Prezident, Ali Baş Komandan İlham Əliyevin rəhbərliyi altında Azərbaycanın rəşadətli ordusu Azərbaycan xalqı ilə vahid "dəmir yumruq" şəklində birləşərək doğma torpaqları işğaldan azad etdi. Qürur duyuruq ki, 44 günlük Vətən müharibəsində İ.M.Seçenov adına Birinci Moskva Tibb Universitetinin Bakı filialının tələbələri prosesdən kənarda qalmadılar. Onlar könüllü şəkildə xəstəxanalarda xidmət etdilər və yaralılara lazımi köməklikləri göstərdilər.

AZƏRTAC xəbər verir ki, bu fikirləri İ.M.Seçenov adına Birinci Moskva Dövlət Tibb Universitetinin Bakı filialının rektoru, professor Əziz Əliyev "Endokrinologiyanın aktual problemləri" konfransında deyib.

Rektor bildirib ki, Azərbaycan xalqı torpaqlarımızın azad edilməsi uğrunda canlarından keçmiş əsgər və zabitlərinin, eləcə də düşmənin bəd əməlləri nəticəsində şəhid olmuş mülki şəxslərin xatirəsini dərin ehtiramla yad edir: "Azərbaycan şanlı Qələbə qazanaraq ölkənin ərazi bütövlüyünü bərpa etdi və bununla da Azərbaycan torpaqlarının vahid, toxunulmaz və bölünməz olduğunu bütün dünyaya bir daha sübut etdi".