Latviya Respublikasının Azərbaycandakı səfirliyi The Landmark biznes mərkəzi, f3.7 birliyi və “PlatformART” təşkilatı ilə birgə Landmark Rotunda Terasda xeyriyyə auksionu təşkil edib.

AZƏRTAC xəbər verir ki, xeyriyyə auksionunda bu yaxınlarda Bakı Fotoqrafiya Evində “Defocused” adlı sərgidə nümayiş edilən fotolar təqdim edilib. Satışa çıxarılan əsərlər 10 istedadlı gənc tərəfindən çəkilib.

Tədbirdə çıxış edən Latviyanın Azərbaycandakı səfirliyinin əməkdaşı Viya Buşa bildirib ki, Latviyanın Avropa İttifaqının “Yaşıl sazişi”nin yerinə yetirilməsində öhdəçiliyi var. Latviya təcrid olunmuş “enerji adasından” azad və şəffaf enerji bazarına nail olmaq yolunda çox işlər görüb. Latviya hər zaman müvafiq Azərbaycan qurumları ilə birgə “Yaşıl enerji” layihələrinə böyük əhəmiyyət verir.

Qeyd edib ki, təmsil etdiyi səfirlik ekoloji problemlərin həllində fəaliyyət göstərən təşkilatlara yardım etmək istəyir. Buna görə də auksiondan əldə edilən gəlir ekologiya sahəsində fəaliyyət göstərən “Ecofront” Qeyri - Hökumət təşkilatının həyata keçirdiyi işlənmiş batareyaların toplanması və ləğv edilməsi aksiyasına yönləndiriləcək.

Layihənin kuratoru Əməkdar incəsənət xadimi Sabina Şıxlinskaya bildirib ki, nümayiş olunan işlər təbiətin gözəlliyini əks etdirir, eyni zamanda ekoloji problemləri də qabardır, ətraf mühitin çirkləndiyini ön plana çəkir: “Bu gün keçirdiyimiz auksion xeyriyyə məqsədi daşıyır. Burada nümayiş olunan işlər Azərbaycanda çəkilib və ölkəmizin füsunkar bir məkan olduğunu göstərir”.

Qeyd edək ki, auksionda fotoqrafiya sahəsində ilk addımlarını atan çox istedadlı 10 fotoqrafın – Emin Mathers, Şərəf Nağıyeva, Tati Səttar, Çiçək Bayramlı, Leyla Musayeva, Zaur Mirzəyev, Kamil Abbaszadə, Orxan Hüseynov, Lalə Əliyeva və Nurlan Babazadənin işləri təqdim olunub.