COVID-19 həqiqətən çox fərqli xəstəlikdir və bu xəstələrin ölüm faizi daha yüksəkdir. Koronavirus xəstələrinin müalicəsində nəticələrimiz bir çox inkişaf etmiş ölkələrlə eyni səviyyədə, hətta bəzilərindən yaxşıdır. Payız-qış aylarında COVID-19-un ikinci dalğası olarsa, daha təcrübəli şəkildə bu mübarizəyə davam edəcəyik.

AZƏRTAC xəbər verir ki, bunu Nazirlər Kabineti yanında Operativ Qərargahın mətbuat konfransında Azərbaycan Tibb Universitetinin Tədris Terapevtik Klinikasının reanimasiya və intensiv terapiya şöbəsinin müdiri Emil Qasımov deyib.

Onun sözlərinə görə, bütün dünyada reanimasiya xidməti çox bahalıdır: “Biz hələ tam sığorta ölkəsi olmasaq da, pandemiya başlayan gündən dövlətin dəstəyini tam hiss etmişik. Reanimasiyada çox bahalı dərmanlardan istifadə olunur. Bunların hamısı dövlətimiz tərəfindən təmin olunub”.