Yanvarın 23-də Beynəlxalq Muğam Mərkəzində Əməkdar kollektiv, Səid Rüstəmov adına Xalq Çalğı Alətləri Orkestrinin 95 illiyinə həsr olunmuş tədbirlər planı çərçivəsində konsert proqramı təqdim olunub.

AZƏRTAC xəbər verir ki, konsertdə orkestrin bədii rəhbəri və baş dirijoru Mustafa Aşurovun idarəçiliyi ilə Azərbaycan musiqi mədəniyyətinin görkəmli nümayəndələrinin əsərləri səsləndirilib.

Proqramda klassik ənənələrə əsaslanan, eyni zamanda müasir yanaşma ilə işlənmiş musiqi nümunələri yer alıb. Konsertdə orkestrin zəngin repertuarını əks etdirən əsərlərlə yanaşı, yeni aranjimanlar da təqdim edilib.

Qeyd edək ki, 2026-cı ildə Əməkdar kollektiv, Səid Rüstəmov adına Xalq Çalğı Alətləri Orkestrinin yaranmasının 95 ili tamam olur. İl ərzində təşkil ediləcək konsertlər də orkestrin 95 illik yubileyinə həsr olunmuş tədbirlər planı çərçivəsində reallaşacaq.