Martın 4-də Beynəlxalq Muğam Mərkəzində Əməkdar artist Nuriyyə Hüseynovanın “Mən bir yaz gülüyəm” adı musiqi albomunun və ifaçıya həsr olunan “Ləyaqət simvolu" kitabının təqdimatı keçirilib.

AZƏRTAC xəbər verir ki, tədbir çərçivəsində həmçinin Nuriyyə Hüseynova tərəfindən yaradılan “Dünya Musiqisinin İncisi Muğam” Qeyri Hökumət Təşkilatının (QHT) da təqdimatı olub.

Təqdimatı Nuriyyə Hüseynova açıq elan edərək yaradılan QHT-nin muğam və musiqi mədəniyyətimizə töhfə verəcəyinə əminliyini ifadə etdi.

Milli Məclisin Mədəniyyət komitəsinin sədri Qənirə Paşayeva çıxışı zamanı Nuriyyə Hüseynovanın yaradıcılığından söz açdı: “Uzun illərdir Nuriyyə xanımın yaradıcılığına bələdəm. Türkiyə, Macarıstan və başqa ölkələrdə, müxtəlif festivallarda birgə iştiraklarımız olub. Ölkə daxilində keçirilmiş çoxsaylı dövlət və ictimai tədbirlərdə olduğu kimi, ölkə xaricində də özünəməxsus sənətkarlıq və doğma vətənə bağlılıqla ifa etdiyi mahnılar coşqu ilə qarşılanıb”.

Qənirə Paşayeva Nuriyyə Hüseynovanı yeni musiqi albomu, haqqında yazılan kitab və yaradılan təşkilat münasibətilə təbrik edərək yorulmaz fəaliyyətində ona uğurlar arzulayıb.

Daha sonra Nuriyyə Hüseynovaya həsr edilən "Ləyaqət simvolu" adlı kitabın müəllifi Vahid Aslan çıxış edib. Müəllif çıxışı zamanı vurğulayıb ki, zamanın önündə addımlamağı özünə həyat amalı seçən Nuriyyə xanım öz yolu ilə inamla irəliləməkdədir. O, həm musiqi savadı, həm də mənəvi zənginliyi ilə mədəni mühitdə hörmət qazanıb. O, muğamlarımızı özünəməxsus şəkildə məharətlə ifa etməklə həm də daima yeniliklər axtarışındadır.

Digər çıxışçılar da üç əlamətdar hadisə münasibətilə Əməkdar artisti təbrik edib, ictimai fəaliyyətdə və yaradıcılıqda ona uğurlar arzulayıblar.

Çıxışlardan sonra Nuriyyə Hüseynovanın tələbələrinin ifasında qısa konsert proqramı təqdim olunub.

Sonda qonaqlara "Ləyaqət simvolu" kitabı və "Mən bir yaz gülüyəm" adı musiqi albomu hədiyyə edilib.