Fevralın 11-də STEAM İnnovasiya Mərkəzində Elm və Təhsil Nazirliyinin, Nərgiz Fondunun dəstəyi və “STEAM Azərbaycan” layihəsinin təşkilatçılığı ilə 11 Fevral – “Qadınlar və qızlar elmdə” Beynəlxalq Gününə həsr olunan tədbir keçirilib.

AZƏRTAC xəbər verir ki, tədbirin əsas məqsədi qızları və gənc qadınları elmi sahələrə təşviq etmək, onların uğurlarını vurğulamaq və bu istiqamətdəki çağırışları müzakirə etmək olub.

“STEAM Azərbaycan” layihəsinin rəhbəri İqrar Nəzərov bildirib ki, 2024-2025-ci tədris ilində bu layihə 398 məktəbi, 252 min 711 şagirdi əhatə edib. STEAM təhsili alan şagirdlərin 47 faizi qız, 53-ü isə oğlandır.

“Bundan başqa, 21 STEAM mərkəzi, bir STEAM İnnovasiya mərkəzi fəaliyyət göstərir. Məqsədimiz qadınların elmi innovativ təşviqi prosesinin gücləndirilməsidir. Beynəlxalq STEAM Azərbaycan festivalında 352 qadın iştirak edib. Bu da qadınların elmdə rolunun nə qədər böyük olduğundan xəbər verir”, - deyə layihə rəhbəri söyləyib.

Elm və Təhsil Nazirliyinin əməkdaşı Ayla Həsənova və “Azərbaycan Qadınları Elmdə” Təşkilatının təsisçisi Günel Ağabəyli açılış nitqlərində qızların elmdə daha fəal iştirak etmələrinin vacibliyini vurğulayıblar.

Daha sonra tədbir çərçivəsində xüsusi hazırlanmış videoçarx nümayiş etdirilib.

Tədbir təlim sessiyası ilə davam edib.

Ekspert Kamran Qasımovun rəhbərlik etdiyi “Keçmişdən gələcəyə: qadınların innovasiyada rolu” adlı interaktiv qrup işində iştirakçılar qadınların elm və texnologiyada keçmiş və müasir dövrdəki töhfələrini təhlil ediblər.

Sonda isə STEAM İnnovasiya Mərkəzinə təşkil edilən ekskursiya çərçivəsində gənclər müxtəlif elmi və innovativ layihələrlə tanış olublar.