"Azərbaycanda meşə sahəsi üzrə bilik çərçivəsinin möhkəmləndirilməsi üçün meşə ehtiyatlarının qiymətləndirilməsi və monitorinqi" layihəsinin əsas məqsədi davamlı meşə idarəetmə sistemini Azərbaycana gətirməklə meşələrin təmin etdiyi iqtisadi, sosial, ekoloji faydaları, meşələrin keyfiyyətini artırmaqdır. Dörd il ərzində bərabər icra olunan layihə çərçivəsində meşəçilik sektoru üzrə bir sıra işlər həyata keçirilib və nailiyyətlər əldə olunub. Layihə çərçivəsində meşə ehtiyatları informasiya sisteminin quraşdırılması və idarəedilməsi, yerli icmaların sosial rifahının yaxşılaşdırılmasına yönəlmiş multifunksional meşə idarəedilməsi sisteminin tətbiqi, yerli mütəxəssislərin bacarıqlarının artırılması və digər sahələrdə səmərəli fəaliyyətlər icra edilib.

AZƏRTAC xəbər verir ki, bunu BMT-nin Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqələndirmə ofisinin rəhbəri Mələk Çakmak layihənin yekun seminarında deyib.

M.Çakmak bildirib ki, Azərbaycanda davamlı meşə idarəedilməsi üçün multifunksional meşə idarəedilməsi planlarının hazırlanması üçün təlimlər tərtib edilib. Ekologiya və Təbii Sərvətlər Nazirliyinin Meşələrin İnkişafı Xidmətinin yeni təlimatı Zaqatala, Balakən, Şamaxı, Qəbələ, Masallı, Lənkəranda test edilib və hər bir meşə sahəsi üzrə meşələrin idarəedilmə planları hazırlanıb. Abşeronda tinglik təsərrüfatının modernləşdirilməsi bu layihənin ən vacib fəaliyyətlərindən biridir. Tinglik təsərrüfatlarının modernləşdirilməsi planının hazırlanaraq tinglik ərazilərində müasir qurğular quraşdırılıb və müxtəlif avadanlıqlar alınıb. Ağdaş və Zərdab rayonlarında yüzlərlə hektar sahədə meşəbərpa tədbirləri həyata keçirilib. Qax və Ağdaş rayonlarında əlavə gəlir gətirən fəaliyyətlər aparılıb, 10 fermerə dəstək göstərilib.

"FAO olaraq Azərbaycanda meşəçilik sektorunda dayanıqlığın təmin edilməsi məqsədilə Azərbaycan hökumətinin bütün təşəbbüslərini dəstəkləməyə hər zaman hazırıq", - deyə M.Çakmak qeyd edib.

Ekologiya və təbii sərvətlər nazirinin müavini Vüqar Kərimov nazirliyin FAO ilə birgə həyata keçirdiyi layihələr haqqında məlumat verib. O, bu fəaliyyətin işğaldan azad edilmiş ərazilərdə də davam etdiriləcəyini diqqətə çatdırıb: "Azad olunan ərazilərdə bioloji müxtəlifliyin qorunması, zəngin su ehtiyatlarının istifadəsi, meşə ehtiyatlarının bərpası, təbii ehtiyatlara dəymiş ziyanın hesablanması istiqamətində birgə fəaliyyət nəzərdə tutulub. İşğaldan azad edilmiş ərazilərdəki xüsusi mühafizə olunan təbiət əraziləri ilə bağlı layihə razılaşdırılma mərhələsindədir. 200 hektar ərazidə meşələrin bərpası nəzərdə tutulur ki, bunun bir hissəsi, ya da hamısı işğaldan azad edilmiş ərazilərdə həyata keçiriləcək".

Sonra Azərbaycan meşələrinə dair videoçarx və layihə haqqında təqdimatlar nümayiş etdirilib.