Biznes subyektləri ilə ilk razılaşma əldə olunub. Bu barədə media nümayəndələrinin də fikirləri qəbul olunub dəyərləndiriləcək.

AZƏRTAC xəbər verir ki, bunu MEDİA Agentliyinin İcraçı direktoru Əhməd İsmayılov bir sıra media subyektlərinin rəhbər və nümayəndələri ilə görüşdə deyib.

O əlavə edib ki, jurnalistlərin peşəkarlığının artırılması üçün Türkiyə və digər ölkələrdən təcrübəli şəxslər dəvət oluna bilər. Bu, peşəkarlığın artırılması üçün vacibdir. Əlbəttə, hələlik bu mövzu müzakirəyə açıqdır. Biz yol xəritəsi təqdim edirik ki, yekun qərarın verilməsində fikri birlikdə formalaşdıraq.

Növbəti iclas barədə danışan İcraçı direktor deyib: "Media nümayəndələrinin peşəkarlığının artırılması üçün təlimlər, həmçinin texniki heyət üçün treninqlər də gündəmdə olan məsələlərdən biridir.

Bundan əlavə, region mediası ilə bağlı narahatlıqları həll etmək üçün gələcəkdə bölgənin media nümayəndələri ilə də fikir mübadiləsinin aparılması planlaşdırılır. Çünki bu, onların problemlərinin həllində kömək ola bilər".

Əhməd İsmayılov, eyni zamanda, deyib: “Jurnalistikaya marağı olan gənclərə yönəlmiş layihələr var ki, Gənclər Fondunun vasitəsilə həyata keçirilə bilər. Bu da mediaya marağı olan gənclərin bu sahəyə həvəsinin artırılması üçün önəmlidir”.

İcraçı direktor strateji planlaşdırma istiqamətində fəaliyyətlərə də toxunub. O deyib: "Biz hesabatları təhlil edib riskləri qiymətləndirmək üçün strateji planlaşdırmalar aparırıq. Mediada baş verən proseslərin təhlili, həmin proseslərin strateji layihələrə təsirinin qiymətləndirilməsi və digər məsələlər bizim üçün önəmlidir".