Nizami Gəncəvi adına Milli Azərbaycan Ədəbiyyatı Muzeyində Azərbaycan ədəbiyyatının görkəmli nümayəndəsi, AMEA-nın həqiqi üzvü, Xalq şairi Bəxtiyar Vahabzadənin 100 illik yubileyi ilə əlaqədar ədəbi-musiqili tədbir keçirilib.

AZƏRTAC xəbər verir ki, tədbiri muzeyin direktoru akademik Rafael Hüseynov açaraq görkəmli şairin ömür yoluna nəzər salıb, onun zəngin ədəbi irsi, milli poeziyada yaratdığı yeniliklər haqqında məlumat verib. O, Xalq şairi Bəxtiyar Vahabzadənin yaradıcılığı ilə Azərbaycan xalqının və mənəviyyatının bir hissəsinə çevrilmiş böyük insan olduğunu vurğulayıb. Qeyd edib ki, sağlığında da canlı tarix olan Bəxtiyar Vahabzadə sadəcə istedadlı söz ustası deyil, xalqın varlığı, taleyi, ruhu ilə qovuşmuş bir yurd fədaisidir. Şair bütün yaradıcılığı ilə mənsub olduğu xalqın yaddaşına hopmuş sənətkarlardandır.

Muzeyin direktoru çıxışında Prezident İlham Əliyevin “Bəxtiyar Vahabzadənin 100 illik yubileyinin qeyd edilməsi haqqında” 2025-ci il 21 fevral tarixli Sərəncamına əsasən şairin yubileyinin ölkə miqyasında geniş şəkildə qeyd olunduğunu diqqətə çatdırıb. O, bugünkü tədbirin də həmin yubiley münasibətilə təşkil edilən silsilə tədbirlər çərçivəsində baş tutduğunu söyləyib.

Böyük şairin həyatda var olan insan kimi anıldığını deyən akademik Rafael Hüseynov onun qələmi və sözüylə ədəbiyyat tariximizdə daim yaşamaq haqqı qazandığını bildirib. O, Bəxtiyar Vahabzadənin yalnız Azərbaycan şairi deyil, bütün Türk dünyasının ortaq şəxsiyyəti, qüdrətli söz ustası olduğunu vurğulayıb. Əlavə edib ki, yorulmaz qələmi, hüdudsuz düşüncələri ilə xalqına xidmət etmiş Bəxtiyar Vahabzadənin poeziyasında insanı azadlığa, dürüstlüyə, Vətənə sədaqətə aparan güclü bir ruh var. Onun bir şair və vətəndaş olaraq qayəsi öz Vətənini bütöv, ölkəsini müstəqil, xalqını azad görmək olub.

Akademik Rafael Hüseynov şairlə bağlı xatirələrini bölüşərək, Bəxtiyar Vahabzadənin Azərbaycanın böyük idealları uğrunda mübarizə apardığını, 1960-cı illərdən başlayan milli azadlıq hərəkatının öncüllərindən biri olduğunu deyib. Bildirib ki, ustad şairimiz sovet imperiyasının repressiya maşının ən güclü vaxtlarında "Gülüstan" poemasını qələmə alıb və o zaman Şəkidə çıxan "Nuxa fəhləsi" qəzetində bu poemanı dərc etdirib. Böyük səs-küyə səbəb olan “Gülüstan” poemasına görə Bəxtiyar Vahabzadə təqib edilib, işdən çıxarılıb. Ulu Öndər Heydər Əliyev o zaman Bəxtiyar Vahabzadəni təhlükədən xilas edib, həbs olunmağa qoymayıb, onu yüksək ad və mükafatlarla təltif edib.

Xalq şairi Bəxtiyar Vahabzadənin yaradıcılığının böyük elmi məktəb olduğunu söyləyən akademik Rafael Hüseynov şairin həm də müəllimlik etdiyini, Azərbaycan dilinin saflığı, təmizliyi və zənginləşməsi uğrunda daim mübarizə apardığını vurğulayıb.

Çıxışının sonunda akademik Rafael Hüseynov qeyd edib ki, Xalq şairi Bəxtiyar Vahabzadə elmi-ictimai fəaliyyəti, böyük şəxsiyyəti, zəngin irsi və bütövlüyü ilə Azərbaycan oxucusunun qəlbində həmişə yaşayacaq.

Daha sonra Bəxtiyar Vahabzadənin yaradıcılığından nümunələr, şairin sözlərinə bəstələnmiş mahnılar səsləndirilib, rəqs nömrələri ifa edilib.