Noyabrın 1-də AMEA-nın Nizami Gəncəvi adına Milli Azərbaycan Ədəbiyyatı Muzeyində “Millətin əbədi iftixarı - Zəfər Günümüz” mövzusunda elmi sessiya keçirilib.

AZƏRTAC xəbər verir ki, tədbirdə çıxış edən muzeyin baş direktoru akademik Rafael Hüseynov 44 günlük Vətən müharibəsində qazanılan şanlı Qələbədən, Müzəffər Ali Baş Komandan, Prezident İlham Əliyevin uğurlu daxili və xarici siyasətindən, Azərbaycan Ordusunun və əsgərinin qəhrəmanlığından söz açıb.

“Hər bir xalqın taleyində həm kədərli, həm də sevincli hadisələr var. Sevincli hadisələr mahiyyəti etibarilə nə qədər böyük olarsa, xalqın tarixindəki kədərli hadisələri unutdura bilir. 30 ilə yaxın erməni əsarətində olan torpaqlarımızın Müzəffər Ali Baş Komandan, Prezident İlham Əliyevin uğurlu diplomatiyası, müdrik siyasəti sayəsində Azərbaycan Ordusu tərəfindən azad edilməsi və qazandığımız Zəfər xalqımızın tarixində qələbələrin, zəfərlərin ən ucasında dayanır. Bu Qələbə Azərbaycan xalqının bütün ruhunu dəyişdi, vüqarını artırdı, başını uca etdi, xalqımızın milli ləyaqət hissini daha yüksək mərtəbəyə çatdırdı. Azərbaycan tarixində bundan böyük Qələbə olmayıb.

Azərbaycandan kiçik olan Ermənistan havadarlarının köməyilə 20 faiz torpaqlarımızı işğal etdi, 1 milyondan çox soydaşımız qaçqın və məcburi köçkün oldu. Əlbəttə ki, mənfur qonşularımızın arxasında dayanan havadarları və siyasi qüvvələr vardı. Ona görə də bu məsələ 30 ilə yaxın bir müddətdə davam edirdi. 2016-cı ilin aprelində Azərbaycanın öldürücü zərbələrindən vahiməyə düşən Ermənistan hər halda anladı ki, bizimlə yalnız özü üz-üzə qalacağı təqdirdə taleyi ən qısa müddətdə birdəfəlik həll edilə bilər. Azərbaycan Prezidentinin də öz çıxışlarında dəfələrlə qeyd etdiyi kimi, bu məsələdə ATƏT-in Minsk qrupu müxtəlif vasitələrlə çatdırırdı ki, “siz bu gerçəkliklə, reallıqla barışın”. Ancaq siyasətin bütün incəliklərinə dərindən bələd olan Prezident İlham Əliyev elə bir məqam gözləyirdi ki, o böyük niyyəti həyata keçirtmək üçün real fürsət yaransın. Bunun üçün Azərbaycan Ordusunun, əsgərinin hərbi təlimlər nöqteyi-nəzərindən mütəşəkkilliyini təmin etmək və ordunun silahlanmasını yüksək səviyyəyə çatdırmaq üçün sistemli iş gedirdi. Nəhayət, o gün gəlib çatdı. 2020-ci ilin sentyabrında yenidən ərazi iddialarına başlayan işğalçı Ermənistana cavab olaraq rəşadətli Azərbaycan Ordusu əks-hücum əməliyyatlarına başladı. 44 günlük müharibə böyük Zəfərlə tamamlandı. Bu Qələbə elə bir siyasətin nəticəsidir ki, orada nə qədər mükəmməl, silahlanmış Ordu da olsa təkcə onun gücünə qazanılan zəfər deyildi. Çünki Azərbaycanla üz-üzə dayanan yalnız Ermənistan, onun Ordusu və lobbisi deyildi. Azərbaycanla qarşı-qarşıya dayanan çox böyük qüvvələr və ölkələr, siyasətlər vardı. Çünki Zəfərdən sonra da biz onların havadarlarının verdiyi bəyanatların, mənfur qonşularımıza göstərdikləri təəssübkeşliyin şahidi olurduq. Bunun üçün də Azərbaycanın ikinci bir Orduya, gücə ehtiyacı var idi. Bu isə Azərbaycan Silahlı Qüvvələrinin Ali Baş Komandanı, Prezident İlham Əliyev idi. 44 gün ərzində xalqımız ölkə rəhbərinin dünyanın aparıcı informasiya vasitələrinə, televiziyalarına qətiyyət və əzmkarlıqla verdiyi müsahibələrinin şahidi oldu. Prezidentimizin bu müsahibələrdə verdiyi bəyanatlar Ermənistana, onun arxasında dayanan qüvvələrə qarşı yönəlmişdi. Bu bəyanatların hər birində qətiyyət, əzm, böyük iradə vardı. Müzəffər Ali Baş Komandanın qətiyyətli mövqeyi, Azərbaycan əsgərinin rəşadəti, xalqımızın birliyi nəticəsində qazanılan Zəfər millətimizin əbədi iftixarıdır. Şuşada olarkən qəhrəman Azərbaycan əsgərinin şücaəti sayəsində, sıldırım qayalardan dırmanaraq azad etdiyi torpaqda böyük Vaqifin yenidən bütün əzəməti ilə yüksələn məqbərəsi qarşısında dayanmaq insanda böyük qürur hissi oyadırdı”, - deyə akademik bildirib.

Sonda Rafael Hüseynov tədbir iştirakçılarını, xalqımızı bu möhtəşəm Qələbənin ildönümü münasibətilə təbrik edib.